Rossiya tashqi ishlar vaziri Sergey Lavrov va AQSH davlat kotibi Entoni Blinken 2-aprel kuni telefon orqali muloqot qildi. Bu haqda Rossiya TIV saytida va Davlat departamenti saytida ma’lum qilindi.
Amerika tomoni tashabbusi bilan boshlangan suhbat Rossiyada josuslikda gumon qilinayotgan The Wall Street Journal jurnalisti Evan Gershkovichning hibsga olinishi haqida ketgan. Xususan, Lavrov AQSHni “Rossiyaning qonunchiligi va xalqaro majburiyatlari asosida qabul qilingan qarorlarini hurmat qilishga” chaqirgan.
“Vashington rasmiylari va G‘arb ommaviy axborot vositalarining bu ishga siyosiy tus berish niyatida shov-shuv ko‘tarishiga yo‘l qo‘yilmasligi ta’kidlandi”, — deyiladi Rossiya TIV matbuot xizmatida.
Lavrov, Kreml va Federal xavfsizlik xizmati kabi, Gershkovich “jurnalistlik maqomi niqobi ostida davlat sirini tashkil etuvchi ma’lumotlarni to‘plash, maxfiy ma’lumotlarni olishga urinayotganda jinoyat ustida qo‘lga olinganini” aytdi.
O‘z navbatida, Blinken “Rossiya tomonidan WSJ muxbirining qabul qilib bo‘lmaydigan hibsga olinishidan AQSHning jiddiy xavotirini” bildirdi va Evan Gershkovichni zudlik bilan ozod qilishga chaqirdi. Bundan tashqari Kremldan noqonuniy hibsga olingan AQSH fuqarosi Pol Uilanni ham zudlik bilan ozod etishni so‘radi.
Shuningdek, tomonlar diplomatik vakolatxonalarga o‘z ishini amalga oshirishga ruxsat beruvchi muhit yaratish muhimligini muhokama qildi.
Eslatib o‘tamiz, 30-mart kuni amerikalik jurnalist Gershkovich Rossiyaning Yekaterinburg shahrida “josuslik”da ayblanib hibsga olindi. The Wall Street Journal jurnalistga nisbatan ayblovlarni rad etib, uni ozod qilishni so‘radi. Jurnalist 20 yilgacha qamoq jazosiga hukm qilinishi mumkin. AQSH davlat kotibi Entoni Blinken ham bunga munosabat bildirib, Amerika fuqarolarini zudlik bilan Rossiyani tark etishga chaqirdi. Polsha ham o‘z fuqarolaridan Rossiyani tark etishni so‘radi.
The Wall Street Journal tahririyati Rossiya elchisi va barcha rossiyalik jurnalistlarni AQSHdan chiqarib yuborishga chaqirdi. Bloomberg, The New York Times, The Washington Post va Politico nashrlari ham Rossiyadan amerikalik jurnalist Evan Gershkovichni ozod qilishni talab qildi.
Izoh (0)