Jahon banki O‘zbekistonga uzoq muddatda pensiya yoshini oshirishni tavsiya qildi.
Tavsiyalar “O‘zbekistonda davlat xarajatlarini ko‘rib chiqish: inson kapitali va suv infratuzilmasiga sarflangan mablag‘lar samaradorligini oshirish” hisobotida keltirilgan.
Hisobotda keksalar sonining ko‘payishi pensiya tizimiga bosim o‘tkazayotgani, shuning uchun uni isloh qilish zarurati paydo bo‘layotgani qayd etilgan.
“O‘zbekiston sobiq Sovet Ittifoqidagi pensiya yoshi eng past respublika bo‘lib, unda ayollar 55 yoshdan, erkaklar 60 yoshdan pensiyaga chiqadi. 1990-yillardagi islohotlari davrida ko‘plab mamlakatlar pensiya yoshini 2-3 yilga oshirgandi. 2000-yillarning ikkinchi o‘n yilligida o‘sishning ikkinchi to‘lqini boshlandi, chunki mamlakatlar uzoq vaqtdan beri kechiktirilgan pensiya yoshidagi islohotlarni boshlagandi (Ukraina, Belarus, Rossiya).
Ilgari pensiya yoshini oshirgan mamlakatlar ushbu bosqichda ayollar va erkaklarning pensiya yoshini bosqichma-bosqich tenglashtirishga alohida e’tibor qaratgan (Ozarbayjon, Armaniston, Moldova, Litva, Qozog‘iston). Estoniya, Latviya, Litva va Ozarbayjonda ayollar va erkaklar uchun pensiya yoshi 65 yoshga ko‘tarildi”, — deyiladi hisobotda.
Jahon bankiga ko‘ra, o‘sib borayotgan demografik yuk pensiya tizimini isloh qilish va mustahkamlash bo‘yicha shoshilinch choralar ko‘rishni talab qiladi.
“2025-yildan boshlab pensiya yoshini sekin (yiliga 3-4 oy) 65 yoshga oshirishni nazarda tutuvchi 2021—2030-yillarga mo‘ljallangan Milliy ijtimoiy himoya strategiyasi doirasida qaror qabul qilish eng yaxshi variant bo‘ladi. Kelajakda bu mehnatga layoqatli va pensiya yoshi o‘rtasidagi chegarani asta-sekin o‘zgartiradi, demografik o'zgarishlar bosimini kamaytiradi.
Mamlakat uchun ishchi kuchining demografik o‘sish salohiyati tugamaguncha (2040-yillarning o‘rtalari) bunga vaqt topish juda muhim, chunki bu allaqachon milliy raqobatbardoshlik masalasidir”, — deya ta’kidlaydi Jahon banki ekspertlari.
Izoh (0)