Rossiyada so‘rovda qatnashgan har oltinchi ish beruvchi mehnat muhojirlarini ishga oladi, ular ko‘pincha O‘zbekiston, Tojikiston va Qirg‘iziston fuqarolaridir. Bu haqda HeadHunter tadqiqotlariga tayanib, “TASS” xabar bermoqda.
“Hh.ru” tadqiqoti shuni ko‘rsatdiki, so‘rovda qatnashgan rossiyalik ish beruvchilarning 16 foizi mehnat muhojirlarini yollaydi. Aksariyat hollarda (76 foiz) bunday ish beruvchilar oyiga 10 kishigacha migrant bilan ishlaydi.
Ma’lum bo‘lishicha, rossiyalik ish beruvchilar ko‘pincha O‘zbekiston (kompaniyalarning 56 foizi), Tojikiston (55 foiz) va Qirg‘iziston (53 foiz) fuqarolarini ishga olishadi.
So‘rov natijalariga ko‘ra, Rossiya kompaniyalarining 61 foizi mehnat muhojirlarini maxsus ko‘nikmalarni talab qilmaydigan lavozimlarga yollaydi. Shuningdek, kompaniyalarning 59 foizi jismoniy mehnat va kasb tajribasi bilan bog‘liq lavozimlarga migrantlarni olishga tayyor.
Har o‘ninchi ish beruvchi chet el fuqarolaridan ta’lim to‘g‘risidagi hujjatlarni so‘raydi, kompaniyalarning 5 foizi uchun avvalgi ish joylaridan tavsiyalar ham muhimdir.
Tahlil natijalariga ko‘ra, 59 foiz rossiyalik ish beruvchilar mehnat muhojirlarini mahalliy aholiga qaraganda kamroq pul so‘ragani uchun ishga oladi.
Har ikkinchi respondent (54 foiz) mehnat muhojirlari mahalliy aholi uchun mos bo‘lmagan sharoitlarda ishlashga rozi, deb javob bergan.
Ularning 37 foizi esa migrantlarni kadrlar yetishmaydigan har qanday ishga yollash kerakligini taʼkidlagan. Suhbatda qatnashganlarning yarmidan ko‘pi (60 foiz) “o‘z mintaqalarida mehnat muhojirlari juda ko‘p” deb hisoblagan.
So‘rovlar 2023-yilning 18-martidan 3-apreliga qadar 2198 nafar rossiyalik ish izlovchi va 483 nafar ish beruvchi kompaniyalar o‘rtasida o‘tkazildi.
Izoh (0)