Toshkent shahrida Oliy taʼlim, fan va innovatsiyalar vazirligi tomonidan O‘zbekiston-Koreya OTMlari rektorlari forumi o‘tkazilmoqda. Forumda Koreyaning 50 nafardan, O‘zbekistonning 150 nafardan ortiq rektorlari qatnashmoqda. Tadbir doirasida Toshkent davlat iqtisodiyot universiteti rektori Kongratbay Sharipov “Daryo” muxbiriga qisqacha intervyu berdi.
Kongratbay Sharipovning aytishicha, Koreya bilan taʼlim sifatini oshirishga doir hamkorlik bir necha yo‘nalishlardan iborat bo‘ladi.
“Birinchi yo‘nalish talabalar mobilligi, o‘quv va fan dasturlarini takomillashtirish bo‘yicha hamkorlikni kengaytirishni o‘z ichiga oladi. Ikkinchi yo‘nalish ilmiy tadqiqot ishlarini hamkorlikda olib borishdan iborat. Hozir yashil iqtisodiyot, raqamlashtirish, yangi texnologiyalar ustida ishlashimiz kerak. Bu bo‘yicha Koreya juda yuqori salohiyatga erishgan dunyodagi yetakchi davlatlardan biridir. Kelajakda mazkur yo‘nalishlar bo‘yicha Koreya bilan hamkorlikni kuchaytiramiz”, — dedi rektor.
Kongratbay Sharipov o‘zbeklar koreyaliklardan o‘rganishi kerak bo‘lgan xususiyatlardan biri to‘g‘risida ham fikr bildirdi.
“Koreya xalqidan o‘rganishimiz kerak bo‘lgan eng muhim xususiyat — mehnatkashlik. Koreyaliklar o‘zining ustida juda ko‘p ishlaydi. Qo‘yilgan masalaga o‘ta masʼuliyat bilan qaraydi. Masalan, Koreyadagi talabalar 12 soatlab, kerak bo‘lsa, 24 soat o‘qiydi. Ular juda ko‘p kitob o‘qiydi. Kutubxonalariga borsangiz, talabalar hatto yotib o‘qiyotganiga ham guvoh bo‘lasiz. O‘zbek talabalari auditoriyalarda 4-6 soat o‘qisa, undan keyin 3-4 soat dars qilishi mumkin. Lekin bu kam. Yana ikki karra ko‘proq o‘qish kerak. Yaʼni auditoriyada 4-6 soat o‘qisa, uyiga borib yana 6-8 soat o‘qishi kerak. Ana shundagina talaba o‘z oldiga qo‘ygan natijalarga erisha oladi, kelajakda mustaqil fikrlay oladigan inson bo‘lib yetishadi”, — dedi universitet rahbari.
Forum doirasida rektorlar o‘zaro fikr almashishi, seminarlar tashkil etilishi va taʼlim yo‘lidagi hamkorlikni rivojlantirishdagi rejalari bilan o‘rtoqlashishi ko‘zda tutilgan. Tadbir yakunida hamkorlik bo‘yicha qator shartnomalar imzolanishi kutilmoqda. Bitimlar asosan, ikki mamlakat o‘rtasidagi oliy taʼlim muassasalari o‘rtasida to‘g‘ridan to‘g‘ri aloqalarni yo‘lga qo‘yishga qaratiladi.
Izoh (0)