“Кореялик талабалар жуда кўп китоб ўқийди” – Конгратбай Шарипов билим олишда корейс ва ўзбек талабалари ўртасидаги фарқ ҳақида
Тошкент шаҳрида Олий таълим, фан ва инновациялар вазирлиги томонидан Ўзбекистон-Корея ОТМлари ректорлари форуми ўтказилмоқда. Форумда Кореянинг 50 нафардан, Ўзбекистоннинг 150 нафардан ортиқ ректорлари қатнашмоқда. Тадбир доирасида Тошкент давлат иқтисодиёт университети ректори Конгратбай Шарипов “Дарё” мухбирига қисқача интервью берди.
Конгратбай Шариповнинг айтишича, Корея билан таълим сифатини оширишга доир ҳамкорлик бир неча йўналишлардан иборат бўлади.
“Биринчи йўналиш талабалар мобиллиги, ўқув ва фан дастурларини такомиллаштириш бўйича ҳамкорликни кенгайтиришни ўз ичига олади. Иккинчи йўналиш илмий тадқиқот ишларини ҳамкорликда олиб боришдан иборат. Ҳозир яшил иқтисодиёт, рақамлаштириш, янги технологиялар устида ишлашимиз керак. Бу бўйича Корея жуда юқори салоҳиятга эришган дунёдаги етакчи давлатлардан биридир. Келажакда мазкур йўналишлар бўйича Корея билан ҳамкорликни кучайтирамиз”, — деди ректор.
Конгратбай Шарипов ўзбеклар кореяликлардан ўрганиши керак бўлган хусусиятлардан бири тўғрисида ҳам фикр билдирди.
“Корея халқидан ўрганишимиз керак бўлган энг муҳим хусусият — меҳнаткашлик. Кореяликлар ўзининг устида жуда кўп ишлайди. Қўйилган масалага ўта масъулият билан қарайди. Масалан, Кореядаги талабалар 12 соатлаб, керак бўлса, 24 соат ўқийди. Улар жуда кўп китоб ўқийди. Кутубхоналарига борсангиз, талабалар ҳатто ётиб ўқиётганига ҳам гувоҳ бўласиз. Ўзбек талабалари аудиторияларда 4-6 соат ўқиса, ундан кейин 3-4 соат дарс қилиши мумкин. Лекин бу кам. Яна икки карра кўпроқ ўқиш керак. Яъни аудиторияда 4-6 соат ўқиса, уйига бориб яна 6-8 соат ўқиши керак. Ана шундагина талаба ўз олдига қўйган натижаларга эриша олади, келажакда мустақил фикрлай оладиган инсон бўлиб етишади”, — деди университет раҳбари.
Форум доирасида ректорлар ўзаро фикр алмашиши, семинарлар ташкил этилиши ва таълим йўлидаги ҳамкорликни ривожлантиришдаги режалари билан ўртоқлашиши кўзда тутилган. Тадбир якунида ҳамкорлик бўйича қатор шартномалар имзоланиши кутилмоқда. Битимлар асосан, икки мамлакат ўртасидаги олий таълим муассасалари ўртасида тўғридан тўғри алоқаларни йўлга қўйишга қаратилади.
