Rossiya prezidenti Vladimir Putin Ukrainadagi urush boshlanganidan buyon ilk bor shu hafta Kremlda biznes-magnatlar bilan uchrashadi. Bu haqda tadbir tashkilotchilariga tayanib, Bloomberg xabar berdi.
Ma’lum qilinishicha, 16-aprel kuni Rossiya Sanoatchilar va tadbirkorlar ittifoqining (RSTI) yuqori a’zolari bilan yig‘ilish bo‘lib o‘tadi. Uchrashuv o‘sib borayotgan xarajatlarni qoplashga qiynalayotgan hukumat kompaniyalarga soliqlarni ko‘proq to‘lash uchun bosimni kuchaytirayotgan bir paytda bo‘lib o‘tdi. 2022-yilgi magnatlar bilan uchrashuv urush fonida bekor qilingandi.
“2023-yilgi murojaatda Putin asosiy e’tiborni iqtisodiy o‘sishni jonlantirish va biznes oldida turgan katta mas’uliyatga qaratmoqchi”, — deyiladi xabarda.
Ayni paytda magnatlar davlatning iqtisoddagi roli ortib borayotganidan xavotir bildirishga umid qilmoqda va biznes muhitini liberallashtirish choralarini ilgari surmoqda. Ular orasida ayrim iqtisodiy jinoyatlarni, jumladan jinoiy daromadlarni legallashtirishni dekriminallashtirish ham bor.
Kreml matbuot kotibi Dmitriy Peskov Putinning rejalari haqida izoh berishdan bosh tortgan.
Urushga sarflanadigan xarajatlar oshib borayotgani sababli budjet taqchilligining kengayishiga duch kelgan hukumat kompaniyalarni bu yil qo‘shimcha yig‘imlar uchun 300 mlrd rubl (3,9 mlrd dollar) to‘lashga majbur qildi. 2022-yili ko‘plab magnatlar Putin bilan omma oldida chiqish ularni sanksiyalar nishoniga aylantirishi mumkinligidan xavotirlangan.
Rossiya Sanoatchilar va tadbirkorlar ittifoqi boshqaruv a’zolaridan biri Alisher Usmonov 2022-yili nafaqaga chiqish va xayriya ishlariga e’tibor qaratish istagini aytib, o‘z lavozimini tark etgandi. RSTI yig‘ilishlarida Putin odatda nutq so‘zlaydi va keyin yopiq eshiklar ortida muhokama qiladi. Putin fevral oy xorijda yashovchi yirik biznes egalarini o‘z taqdirlarini o‘z vatanlari bilan to‘g‘ridan to‘g‘ri bog‘lashga chaqirgan.
Izoh (0)