Moskvaning bir nechta tumanlarida havo hujumidan mudofaa tizimlarini o‘rnatish uchun o‘rmon va parklardagi daraxtlarni kesish boshlandi. Bu haqda The Insider xabar berdi.
2023-yil boshlangach Rossiya Mudofaa vazirligi ehtiyojlari uchun Losiniy orolida, Timiryazev qishloq xo‘jaligi akademiyasining dalalarida, Kolomenskoye muzey-qo‘riqxonasining qo‘riqlanadigan zonasida o‘rmonlardagi daraxtlarni kesish boshlandi. Rossiya Qurolli Kuchlarining ikkita obyektiga allaqachon S-400 zenit-raketa tizimlari joylashtirilgan.
“Bu Moskvani himoya qilish uchun”, — deydi post-patrul xizmati a’zosi.
Moskvada S-400 ning joylashtirilishi haqida rasmiy bayonotlar yo‘q. Shu bilan birga, turar-joy binolari yonida havo mudofaa tizimlari o‘rnatilgan. Qishloq xo‘jaligi akademiyasi yaqinidagi eng yaqin uy Bolshaya Akademicheskaya ko‘chasida taxminan 200 metr uzoqlikda joylashgan.
Xuddi shu havo mudofaa tizimi “Losiniy Ostrov” qo‘riqxonasida joylashgan. Shu bilan birga, Rossiya telegram kanallari qo‘riqxona hududida mudofaa tizimi joylashtirilganini soxta deb atab, bu xavfli ekanini ta’kidlaydi. C-400 jangovar holatda emasligi, shuning uchun “Losiniy Ostrov” vaqtinchalik to‘xtash joyi ekani keltirilgan. Biroq, The insider hozirda kompleksning yarmi qo‘mondonlik va boshqaruv markazi bilan birga jangovar holatda ekanini aytgan. Qo‘riqxonada daraxt kesish taqiqlangan, ammo rahbariyat faollarga “Rossiyaning milliy xavfsizligi va mudofaasini ta’minlash uchun” shunday qilinganini ta’kidlagan.
Biroq, ommaviy axborot vositalarining yozishicha, atrof-muhitga eng katta zarar Moskva janubi-sharqidagi Kuryanovo mikrorayoniga yetkazilgan. U yerda, maxfiylik sharoitida, Moskva daryosining chap qirg‘og‘idagi ulkan o‘rmondagi daraxtlar kesib tashlangan. Hududga havo hujumidan mudofaa tizimi joylashtiriladi. Buning uchun 2 km dan ortiq maydonda 100 gektar o‘rmon kesilgan.
“55 gektar maydonni egallagan 10 ta obyekt bo‘ladi. Ulardan kamida bittasiga havo mudofaasi joylashtiriladi”, — deydi “Avtomobil yo‘llari davlat budjeti muassasasi” xodimi.
Shu bilan birga, hokimiyat daraxt kesilishi bo‘yicha mahalliy aholi so‘roviga javob berishdan bosh tortgan. Faqatgina “VKontakte” ijtimoiy tarmog‘ida Davlat Dumasi deputati Svetlana Razvorotneva Kuryanovoda aslida relikt o‘rmoni yo‘qligini va bularning barchasini soxta ekanini yozgan. Jurnalistlar Izmailovskiy o‘rmon bog‘ida ham daraxtlar kesilishini aniqlagan. Kolomenskoye yaqinida UNESCO ro‘yxatiga kiritilgan o‘rmon kesilgan, bu obyektning qiymatini xavf ostiga qo‘yadi.
Izoh (0)