Prezidentning tegishli qarori bilan, Toshkent shahridagi isteʼmolchilarning energiya resurslariga o‘sib borayotgan talabini qondirish maqsadida bir qator chora-tadbirlar belgilandi, deb xabar beradi O‘zA.
Jumladan, Energetika vazirligining:
- ACWA Power (Saudiya Arabistoni) kompaniyasi ishtirokida Toshkent viloyati Yuqori Chirchiq tumanidagi “O‘zsuvtaʼminot” AJ hududida quvvati 400 MVt bo‘lgan quyosh fotoelektr stansiyasini qurish loyihasining birinchi bosqichi quvvatlarini (100 MVt);
- China Gezhouba Group Investment Company Co., Ltd (Xitoy) kompaniyasi ishtirokida Toshkent viloyati Yuqori Chirchiq tumanida quvvati 700 MVt bo‘lgan quyosh fotoelektr stansiyasini qurish loyihasining birinchi bosqichi quvvatlarini (100 MVt) 2023-yil yakuniga qadar ishga tushirish to‘g‘risidagi takliflariga rozilik berildi.
Shuningdek, Energetika vazirligining “Hududiy elektr tarmoqlari” AJ va “O‘zbekiston milliy elektr tarmoqlari” AJga tegishli elektr tarmoqlari obyektlarini “O‘zbekiston milliy elektr tarmoqlari” AJ va “Hududiy elektr tarmoqlari” AJga balans (qoldiq) qiymatida berish to‘g‘risidagi taklifiga rozilik beriladi.
Bunda obyektlar barcha elektr qurilmalari, mol-mulklar, ularning texnik hujjatlari, shuningdek, boshqa muhandislik tarmoqlari va kommunikatsiyalari bilan birga “O‘zbekiston milliy elektr tarmoqlari” AJ va “Hududiy elektr tarmoqlari” AJning ustav kapitalidagi davlat ulushini oshirish (kamaytirish) hisobiga o‘tkaziladi hamda soliqdan ozod qilinadi.
Avvalroq Jahon banki Ijrochi direktorlar kengashi “O‘zbekistonda quyosh energetikasini kengaytirish-2” loyihasini amalga oshirish uchun 12 million AQSH dollari miqdoridagi moliyalashtirishni ma’qullagandi.
Izoh (0)