Surxondaryo viloyati Jarqo‘rg‘on tumanida qoidani buzgan haydovchi mashinasini jarima maydoniga joylashtirmasligi uchun yo‘l-patrul xizmati xodimiga pora taklif qildi. Bu haqda viloyat Yo‘l harakati xavfsizligi boshqarmasi xabar qildi.

Qayd etilishicha, 20-mart kuni Jarqo‘rg‘on tumani Kakaydi qo‘rg‘onida xizmat olib borayotgan YPX inspektori N.E. Nexia mashinasining harakati shubha tug‘dirgan sababli to‘xtatgan. Haydovchi A.S. bilan suhbatlashish jarayonida undan spirtli ichimlik hidi kelib turganini sezgan va alkotestor moslamasi orqali tekshirib ko‘rib, haydovchining mastlik holatini aniqlagan. Inspektor holat yuzasidan haydovchiga nisbatan ma’muriy bayonnoma rasmiylashtirib, transport vositasini vaqtinchalik saqlash uchun jarima maydoniga joylashtirgan.

Haydovchi A.S. YPX inspektori jarima maydonidan chiqib ketayotgan vaqtida o‘ziga nisbatan chora ko‘rmasdan, avtomashinani jarima maydonidan chiqarib berishini iltimos qilib, evaziga 300 dollar miqdorida pora taklif qilgan. Inspektor fuqaroga bu taklifi qonunda belgilangan javobgarlikka sabab bo‘lishini tushuntirishiga qaramay, haydovchi pora taklif qilishda davom etgan.

Shundan so‘ng YPX xodimi viloyati IIB boshlig‘i nomiga fuqaro A.S.ga nisbatan chora ko‘rishni so‘rab, bildirgi bilan murojaat qilgan. Bildirgiga asosan 21-mart kuni soat 12:00 larda tumanning “Ismoiltepa” mahallasida joylashgan jarima maydoni yonida tezkor tadbir o‘tkazilgan, Unda fuqaro A.S. YPX inspektoriga 300 dollar miqdoridagi kupyuralarni pora tariqasida berayotgan vaqtida tadbir ishtirokchilari tomonidan ushlangan va holat protsessual tartibda rasmiylashtirilgan.

Hozirda holat yuzasidan Jarqo‘rg‘on tumani prokuraturasi tomonidan tergovga qadar tekshiruv harakatlari olib borilmoqda.