Relativity Space kompaniyasi tomonidan Terran 1 raketa tashuvchisining kosmosga debyut parvozi muvaffaqiyatsiz yakunlandi. Bu haqda Space xabar berdi.
.jpg)
Mazkur raketaning 85 foiz qismi 3D-bosma bo‘lib, u kosmosga chiqishi kerak bo‘lgan dunyodagi eng katta obyektdir. Raketa 8-mart kuni kechqurun uchirilishi kerak edi, biroq dvigatellarida yonilg‘i harorati ko‘tarilgani sababli uchirilishidan 70 soniya oldin to‘xtatilgan.
Dastlab, Relativity Space muhandislari yuzaga kelgan muammoni hal qilmoqchi bo‘lishgan, ammo uchirishni kechiktirish to‘g‘risida qaror qabul qilingan. Raketa 11-martgacha, ya’ni Terran 1 ni koinotga yuborishga ikkinchi urinish amalga oshirilgunga qadar Floridadagi uchish maydonchasida qoladi.
Shtab-kvartirasi Kaliforniyada joylashgan Relativity Space kompaniyasi vakili raketaga katta umid bog‘layotganini va 3D-bosma raketani uchirish bo‘yicha navbatdagi urinish muvaffaqiyatli bo‘lishiga ishonchi komilligini aytdi. Mavjud ikki bosqichli raketalar bilan solishtirganda, Terran 1 nisbatan kichik bo‘lib, 33 metrga (taxminan 10 qavatli bino balandligi) teng. Ushbu raketaning asosiy vazifasi kichik sun’iy yo‘ldoshlarni past yer orbitasiga uchirishdan iborat.
Terran 1 raketasi koinotga 900 kg dan 1 250 kg gacha foydali yuklarni olib chiqa oladi. Uni ishga tushirish narxi taxminan 12 million dollarni tashkil qiladi. Hozirda Amerika kompaniyasi muhandislari balandligi 66 metr bo‘lgan va koinotga 20 tonna foydali yuk yetkaza oladigan Terran R raketasini yaratish ustida faol ishlamoqda. Ushbu raketaning birinchi parvozi 2024-yilga mo‘ljallangan.
Izoh (0)