Turkiyaning Hatay viloyati Iskenderun shahrida vayronkor zilzilalardan jabr ko‘rgan aholi uchun o‘zbekistonlik oshpazlar har kuni palov pishirmoqda. Bu haqda Anadolu xabar berdi.
50 kishidan iborat o‘zbekistonlik ko‘ngillilar tabiiy ofat oqibatlarini bartaraf etish maqsadida zilzilalarning ikkinchi kunidayoq Hatay viloyatiga yetib kelgan. Tashrif Istanbuldagi O‘zbekiston madaniyat, tadqiqot va birdamlik uyushmasi tomonidan tashkil etilgan. Ko‘ngillilar muhtojlarga insonparvarlik yordamlarini tarqatish bilan birga, dala oshxonasida ovqat tayyorlamoqda.
O‘zbekistonlik oshpazlar har kuni ertalab 16 ming kishiga taom tayyorlaydi, jumladan, zilziladan jabr ko‘rgan Iskenderun, Qirixon va Antakya hududlariga o‘zbek palovi yetkazib beriladi. Guruh koordinatori Azizbey Muxammediyevning Anadolu nashriga bergan intervyusida aytishicha, o‘zbekistonlik ko‘ngillilar 6-fevraldagi zilzilalar haqida bilishi bilanoq falokat hududiga yetib borgan. Qidiruv-qutqaruv ishlarida 20 nafar ko‘ngilli ishtirok etgan.
“Ular oziq-ovqat va insonparvarlik yordami bilan ta’minlashda ham ishtirok etdi”, — deydi Muxammediyev.
Guruh koordinatori qidiruv-qutqaruv guruhlari ish nihoyasiga yetgach, hududni tark etgani, oshpazlar esa o‘z vazifalarini bajarishda davom etganini aytdi.
“Dastlab 1 500 kishiga osh tarqatishni rejalashtirgan edik, biroq issiq ovqatga ehtiyoj borligini ko‘rib, uni oshirdik. Odatda biz o‘zbek palovini pishiramiz, uni pishirish uchun 50 kg go‘sht kerak bo‘ladi. Uni tayyorlashda O‘zbekistondan keltirilgan sabzi, basmati guruchidan foydalanamiz. Hozir 5 oshpaz va 15 yordamchimiz bor. 10 kishi issiq ovqat tarqatmoqda”, — dedi koordinator.
Turkiyaning janubi-sharqida 6-fevral kuni 7 magnitudadan yuqori ikkita zilzila sodir bo‘ldi. Tabiiy ofat qurbonlari soni 46,1 ming kishidan oshdi. Yer silkinishi Suriya, Livan, Shimoliy Kipr Turk Respublikasi, Gretsiya Kipri va Iroqda ham sezildi.
Izoh (0)