“Daryo” nashri 9-martda O‘zbekiston va jahonda sodir bo‘lgan eng muhim voqealarni e‘tiboringizga havola etadi.
Rossiyaning aeroballistik raketalari Ukraina mudofaasini buzib o‘tmoqda
Rossiya kuchlari Ukraina hududini bir vaqtning o‘zida Shahed kamikadze dronlaridan tortib, deyarli barcha turdagi qanotli raketalar bilan o'qqa tutdi.
Ukrainaning havo hujumidan mudofaa tizimlari qanotli raketalar va dronlar zarbasini to'xtatgan. Ammo ‘Kinjal’ tipidagi aeroballistik raketa infratuzilma obyektiga kelib tushgan va 7 soat davomida havo hujumidan ogohlantirish tizimi yoqilgan.
Ukraina qurolli kuchlari harbiy-havo kuchlari spikeri Yuriy Ignat vaziyat haqida ma’lumot berar ekan mamlakat hududiga uchirilgan Rossiyaning X-22, ‘Kinjal’ va C-300 raketalarini Ukraina armiyasi urib tushira olmasligini aytdi. “Ular bizga xavf tug‘dirmoqda”, — dedi u. Ayni vaziyatda Vladimir Putin urushga nisbatan o‘z ambitsiyalarini o‘zgartirmagan.
AQSH Milliy razvedkasidan Avril Xeynsning CNNga bergan intervyusida esa Putin Ukrainaga qarshi yillab urushishga tayyor ekanligi va bu yo‘l bilan vaqtni o‘z foydasiga hal qilishga umid qilayotgani aytilgan.
Ukraina Baxmutni himoya qilishga qaror qildi
Hozirda Ukraina hukumati yirik shaharlarga yo‘l ochuvchi Baxmut mudofaasini davom ettirishga qaror qilgan. Chunki mamlakat Qurolli kuchlarining chekinishi Rossiya harbiylarining oldinga siljib, Donbassning yirik shaharlarini nazoratga olishini ta’minlaydi deydi Ukraina prezidenti CNN bilan suhbatda.
Rossiya mudofaa vaziri Sergey Shoygu so‘zlariga ko‘ra, Rossiya qo‘shinlari tomonidan shaharning nazoratga olinishi “Ukraina Qurolli kuchlari mudofaasi uchun keyingi hujum operatsiyalarini” o‘tkazish imkonini beradi.
CNN’ning ma’lum qilishicha, ayrim ukrain komandirlari va ofitserlari yo‘qotishlar fonida shaharni saqlab qolish maqsadga muvofiqligiga shubha bildirmoqda.
Bu haqda Zelenskiy: ukrainalik harbiylar tinch aholining ketishiga yordam berish uchun shaharda qolishlari kerakligini o‘zlari tushunib turibdi” deya izoh berdi.
Gruziyada ommaviy norozilik namoyishlari: xorijdan mablag’ oluvchilar ro‘yxati nima uchun tuziladi
Gruziyada “xorijiy agentlar” haqidagi qonun loyihasiga qarshi ommaviy noroziliklar bir necha kundan beri davom etmoqda. 7-martda qabul qilingan qonun xorijdan mablag' oladigan jismoniy va yuridik shaxslar ro'yxatini shakllantirishi va yoki ularga xorijiy agent maqomini berishi mumkin edi.
Hozirda mamlakatdagi hukmron partiyalar noroziliklar fonida qonun loyihasini qaytarib oldi.
“Qabul qilingan qonun loyihasi jamiyatda bahs-munozaralarga sabab bo‘lganini ko‘rib turibmiz. Bu loyihaga “Rossiya qonuni” degan noto‘g‘ri tamg‘a urildi va uning birinchi o‘qishda qabul qilinishi jamoatchilikning bir qismi nazarida Yevropa yo‘nalishidan chekinish sifatida ko‘rsatildi”, — deyiladi tomonlarning qo‘shma bayonotida.
O‘zbekistonda qaysi lavozimdagi shaxslarning ikki muddatdan ortiq vaqtga saylanishi taqiqlanmoda? Konstitutsiyaviy qonun loyihasi muhokamada
O‘zbekiston Konstitutsiya loyihasida davlat hokimiyatining bir qator lavozimlaridagi shaxslar ikki muddatdan ortiq vaqtga tayinlanishi taqiqlanmoqda.
Qayd etilishicha, Konstitutsiya loyihasida davlat hokimiyatining bir qator lavozimlariga nisbatan ayni bir shaxs surunkasiga ikki muddatdan ortiq ushbu lavozimga saylanishi (tayinlanishi) mumkin emasligiga oid demokratik qoida kiritilmoqda.
Unga ko‘ra, quyidagi lavozimlarga bir shaxs ikki martadan ortiq saylanishi mumkin emas:
- Qonunchilik palatasi spikeri;
- Senat raisi;
- O‘zbekiston Respublikasining prezidenti;
- viloyat, tuman, shahar xalq deputatlari kengashining raisi;
hokim; - Oliy sudning raisi va rais o‘rinbosari;
- Sudyalar oliy kengashining raisi va rais o‘rinbosari;
- Markaziy saylov komissiyaning raisi;
- Bosh prokuror.
Oliy Majlis Qonunchilik palatasida 9-mart, ya’ni bugun bo‘lib o‘tadigan yalpi majlisda deputatlar referendum o‘tkazish haqida qaror qabul qilishi kutilmoqda. Ushbu majlisda Konstitutsiyaviy qonun loyihasi ko‘rib chiqiladi.
Izoh (0)