Samarqand viloyati Oqdaryo tumanida sodir bo‘lgan yo‘l-transport hodisasi oqibatida 3 kishi halok bo‘ldi. Bu haqda “Sevimli” telekanalining “Zamon” informatsion dasturida ma’lum qilindi.
Qayd etilishicha, tuman hududidan o‘tuvchi M-37 avtomobil yo‘lining 44-kilometrida harakatlanib kelayotgan Lacetti yo‘lning o‘ng tarafida to‘xtab turgan yuk mashinasining orqasiga kelib urilgan. Hodisa oqibatida Lacetti haydovchisi va ikki yo‘lovchi olgan tan jarohatlari oqibatida voqea joyida vafot etgan.
Shuningdek, yana bir yo‘lovchi Respublika shoshilinch tibbiy yordam ilmiy markazi Samarqand filialiga yotqizilgan.
Ma’lum qilinishicha, Buxoro—Samarqand yo‘nalishida harakatlanib kelayotgan Lacetti haydovchisi yo‘lda uxlab qolgan.
Holat yuzasidan Oqdaryo tumani IIB Tergov bo‘limi tomonidan Jinoyat kodeksining 266-modda (Transport vositalari harakati yoki ulardan foydalanish xavfsizligi qoidalarini buzish) 3-qismi bilan jinoyat ishi qo‘zg‘atilgan bo‘lib, dastlabki tergov harakatlari olib borilmoqda.
Izoh (0)