Qoraqalpogʻistonning Qo‘ng‘irot tumanida Nexia-3 yuk mashinasi bilan to‘qnashishi oqibatida besh kishi halok bo‘ldi. Bu haqda Qoraqalpog‘iston IIV xabar berdi.
Ma’lum qilinishicha, voqea 4-fevral kuni A-380 Gʻuzor—Buxoro—Nukus—Beyneu avtomobil yo‘lining “Jasliq” posyolka fuqarolar yig‘inidan o‘tgan qismida yuz bergan. Nexia-3 haydovchisi Qoʻngʻirot tumani yoʻnalishi boʻylab harakatlanib ketayotganida boshqaruvini yoʻqotib, qarama-qarshi yoʻnalishda harakatlanib ketayotgan Mercedes-Benz yuk mashinasi bilan toʻqnashib ketgan.
“Kruz.uz”ning maʼlumot berishicha, YTH oqibatida 5 kishi — ikki erkak va uch nafar ayol vafot yetgan. Ularning barchasi “Jasliq” posyolkasida yashagan.
Holat yuzasidan Qoraqalpogʻiston Respublikasi IIV qoshidagi Tergov boshqarmasi tomonidan Jinoyat kodeksining 266-moddasi 3-qismi “a” bandi (transport vositalari harakati yoki ulardan foydalanish xavfsizligi qoidalarini buzish odamlar oʻlimiga sabab boʻlishi) bandi bilan jinoyat ishi qoʻzgʻatilib, tergov harakatlari olib borilmoqda.