Toshkent shahrida 7-mart kuni Afg‘oniston bilan qo‘shni davlatlar maxsus vakillarining birinchi uchrashuvi bo‘lib o‘tdi. Tadbirda O‘zbekiston, Eron, Xitoy, Pokiston, Rossiya, Tojikiston va Turkmaniston vakillari Afg‘onistondagi mavjud holat, mamlakatdagi vaziyatni tartibga solish masalalarini muhokama qildi, deb xabar bermoqda “Daryo” muxbiri.
Uchrashuv avvalida maxsus vakillar afg‘on xalqiga gumanitar yordam ko‘rsatish, mamlakatdagi inqirozini tinch yo‘l bilan hal etish bo‘yicha mintaqaviy sa’y-harakatlarni birlashtirish bo‘yicha fikr almashdi. Mamlakatda inklyuziv hukumat tuzish, inson huquqlari masalalari yuzasidan yopiq eshiklar ortida muzokaralar o‘tkazildi.
Shundan so‘ng O‘zbekiston prezidentining Afg‘oniston bo‘yicha maxsus vakili Ismatulla Ergashev ommaviy axborot vositalari uchun qisqa brifing tashkil etdi. Unda aytishicha, birinchi marta tashkil etilayotgan bu majlis a’zo mamlakatlar tashqi ishlar vazirlarining qarori bilan amalga oshirilgan.
“Yaqinda Afg‘oniston bilan qo‘shni davlatlar tashqi ishlar vazirlarining 3-uchrashuvi bo‘lib o‘tgandi. Ana o‘sha majlisda vazirlarning qarori bilan shu format asosida maxsus vakillarning ham konsultatsiyasini, o‘zaro fikr almashinuvini yo‘lga qo‘yishga kelishilgan edi. Shunga binoan bugun Afg‘oniston bilan qo‘shni davlatlar maxsus vakillarining birinchi majlisini o‘tkazdik. Aytib o‘tishim kerakki, bu uchrashuv yaqin kelajakda Toshkent shahrida bo‘lib o‘tadigan Tashqi ishlar vazirlarining 4-uchrashuvini tayyorlashga ham qaratilgan“, — dedi brifing avvalida Ismatulla Ergashev.
Maxsus vakilning ta’kidlashicha, majlisda Afg‘onistondagi ijtimoiy-iqtisodiy vaziyat, inson huquqlari, milliy ozchilikni tashkil etayotgan xalqlarning haq-huquqlari va qizlarning o‘qishi, ta’lim olishi va ishlashi huquqlari masalalarini muhokama qilingan.
“Barcha maxsus vakillar ayollarning haq-huquqini ta’minlash, ularning ozodligini ta’minlash eng asosiy masalalardan biri ekanini aytdi. Afg‘oniston hukumatini ushbu taqiqlash qonunini olib tashlash va tez kunda ayollarga o‘qish, ta’lim olish va ozod ishlash imkonini qaytarib berishga chorladi. Mamlakatda gumanitar inqirozning kuchayishi tahdidi hamda iqtisodiy vaziyatning keskin va butkul qulashi ehtimoli barcha qo‘shni mamlakatlar, shuningdek, xalqaro hamkorlarni tashvishga solmoqda. Biz Afg‘onistonning bugungi hukumati xalqaro hamjamiyatning talablarini, bergan va’dalarini bajarishini talab qildik”, — deydi Ismatulla Ergashev.
Shuningdek, afg‘on xalqini qtisodiy-ijtimoiy sharoitda qo‘llab-quvvatlash, yordam berishga urg‘u berildi. Maxsus vakillar Afg‘oniston markaziy banki xorijiy pullarni ozod qilishi va uni xalqqa qaytarib berishi zarurligini ta’kidladi.
“25 million aholi, ulardan 6 millioni oziq-ovqatdan batamom mahrum bo‘lib qolgani ta’kidlandi. O‘zbekiston prezidentining Afg‘oniston bo‘yicha xalqaro muzokara guruhini tuzish taklifi bo‘yicha fikr almashildi. Uchrashuv qatnashchilari bu tashabbusni ijobiy baholadi va uchrashuv yakunida qabul qilingan qo‘shma bayonotda o‘z aksini topdi”, — deya fikr bildirdi maxsus vakil.
Uning ma’lum qilishicha, aprel oyi oxirida Nyu York shahrida Birlashgan Millatlar Tashkiloti bosh kotibi Antonio Gutterish bilan bo‘ladigan Afg‘oniston masalasidagi uchrashuvda bu taklif batafsil o‘rganib chiqiladi.
Qo‘shni davlatlar qo‘shma bayonotda Afg‘oniston quyidagi va’dalarini bajarishiga umid bildirdi:
- o‘z hududidan hech bir qo‘shni davlatga yoki hech qaysi uchinchi davlatga nisbatan tahdid solmaslik;
- mamlakatda tinchlik-totuvlikni ta’minlash;
- keng qamrovli hukumat tuzish;
- narkotik moddalarni ishlab chiqarish va ularni tarqatishga qarshi faol kurash olib borish;
- hududda xalqaro terroristik tashkilotlar bo‘lmasligi va ularni faoliyat olib borishga sharoit yaratmaslik.
Izoh (0)