Самарқанд вилояти Оқдарё туманида содир бўлган йўл-транспорт ҳодисаси оқибатида 3 киши ҳалок бўлди. Бу ҳақда “Севимли” телеканалининг “Замон” информацион дастурида маълум қилинди.
Қайд этилишича, туман ҳудудидан ўтувчи М-37 автомобиль йўлининг 44-километрида ҳаракатланиб келаётган Lacetti йўлнинг ўнг тарафида тўхтаб турган юк машинасининг орқасига келиб урилган. Ҳодиса оқибатида Lacetti ҳайдовчиси ва икки йўловчи олган тан жароҳатлари оқибатида воқеа жойида вафот этган.
Шунингдек, яна бир йўловчи Республика шошилинч тиббий ёрдам илмий маркази Самарқанд филиалига ётқизилган.
Маълум қилинишича, Бухоро—Самарқанд йўналишида ҳаракатланиб келаётган Lacetti ҳайдовчиси йўлда ухлаб қолган.
Ҳолат юзасидан Оқдарё тумани ИИБ Тергов бўлими томонидан Жиноят кодексининг 266-модда (транспорт воситалари ҳаракати ёки улардан фойдаланиш хавфсизлиги қоидаларини бузиш) 3-қисми билан жиноят иши қўзғатилган бўлиб, дастлабки тергов ҳаракатлари олиб борилмоқда.
Изоҳ (0)