Gruziya parlamenti 7-mart kuni birinchi o‘qishdayoq “xorijiy agentlar” to‘g‘risidagi qonun loyihasini qabul qildi. “Xorijiy ta’sirning shaffofligi to‘g‘risida”gi qonun loyihasini 76 nafar deputat yoqlagan bo‘lsa, 13 nafari unga qarshi chiqqan, deb yozadi “Gruziya yangiliklari” portali.
Qonun loyihasiga muvofiq, Gruziyada “xorijiy agentlar” reyestri paydo bo‘ladi va unga 10 foizdan ortiq qismi xorijdan moliyalashtiriladigan barcha notijoriy yuridik shaxslar va OAVlar kiritiladi.
Qonun loyihasining ikkinchi variant — “Xorijiy agentlarni ro‘yxatga olish to‘g‘risi”dagi hujjatga ovoz berish 9-mart kuni bo‘lib o‘tadi.
Gruziya parlamenti “xorijiy agentlarning ta’siri”ga oid qonun loyihasini ommaviy norozilik namoyishlari fonida muhokama qildi. Ovoz berish jarayonida Rustaveli ko‘chasidagi parlament binosi qarshisida bir necha ming odam to‘plangan. Tbilisi politsiyasi ko‘zni yoshlantiruvchi gaz va vodomyotlardan foydalangan holda namoyishchilarni tarqatishga kirishgan. Namoyishchilar politsiya xodimlariga shisha idishlar, “Molotov kokteyli”ni uloqtirgan. Mahalliy vaqt bilan yarim tundan keyin ular parlament binosniga kirishga uringan. Mamlakat IIVning dastlabki ma’lumotlariga ko‘ra, 6 kishi qo‘lga olingan.
Gruziya prezidenti Salome Zurabishvili namoyishchilarni qo‘llab-quvvatladi. 7-mart kuni u Nyu-Yorkdan turib Gruziya xalqiga murojaat yo‘llagan. Prezident “xorijiy agentlar” to‘g‘risidagi qonunga veto qo‘yish huquqidan foydalangan. “Bu bugun va ertaga sodir bo‘lmaydi, ammo qonun loyihasi parlamentdan chaqirib olinishi kerak”, — degan Zurabishvili.
Salome Zurabishvili 2-mart kuni mazkur qonun loyihasi tarafdorlariga ushbu tashabbus sabab Gruziya Yevropa Ittifoqi va NATOga qo‘shilish nomzodligidan mahrum bo‘lishiga olib kelishini aytgandi.
Izoh (0)