Checheniston rahbari Ramzan Qodirovning 17 yoshli o‘g‘li Axmat Qodirovning nikoh to‘yi bo‘lib o‘tdi. Rossiyalik mashhur xonanda Timati internetda 87 ta hashamatli mashinadan iborat to‘y korteji videosini joylashtirdi.
Ma’lum qilinishicha, to‘y marosimini suratga olish qat’iyan taqiqlangan. Biroq ayrim videolar ijtimoiy tarmoqlarda e’lon qilingan. 87 ta premium avtomobilga (Bugatti’dan Rolls-Royce’gacha) 11 ta politsiya mashinasi hamrohlik qilgan. 17 yoshli Axmat Qodirovning nikoh to‘yining aniq sanasi rasman ma’lum qilinmagan. Ammo 4-mart kuni Checheniston rahbari Rossiya prezidenti Vladimir Putin Axmatni yaqinlashib kelayotgan to‘yi bilan tabriklash uchun o‘g‘li bilan uchrashganini aytgan.
Ta’kidlanishicha, Ramzan Qodirov to‘y kuni Chechenistonda turmush qurganlarning barchasiga 100 ming rubl miqdorida to‘lov berishga, to‘y xarajatini qoplashga va’da bergan. Ramzan Qodirovning o‘g‘li Axmat MMA janglarida qatnashadi. Chechenistondagi sport majmuasi uning sharafiga nomlangan. U “maxsus harbiy operatsiya” zonasiga ham tashrif buyurgani xabar qilingan.
Izoh (0)