Грузия парламенти 7 март куни биринчи ўқишдаёқ “хорижий агентлар” тўғрисидаги қонун лойиҳасини қабул қилди. “Хорижий таъсирнинг шаффофлиги тўғрисида”ги қонун лойиҳасини 76 нафар депутат ёқлаган бўлса, 13 нафари унга қарши чиққан, деб ёзади “Грузия янгиликлари” портали.
Қонун лойиҳасига мувофиқ, Грузияда “хорижий агентлар” реестри пайдо бўлади ва унга 10 фоиздан ортиқ қисми хориждан молиялаштириладиган барча нотижорий юридик шахслар ва ОАВлар киритилади.
Қонун лойиҳасининг иккинчи вариант — “Хорижий агентларни рўйхатга олиш тўғриси”даги ҳужжатга овоз бериш 9 март куни бўлиб ўтади.
Грузия парламенти “хорижий агентларнинг таъсири”га оид қонун лойиҳасини оммавий норозилик намойишлари фонида муҳокама қилди. Овоз бериш жараёнида Руставели кўчасидаги парламент биноси қаршисида бир неча минг одам тўпланган. Тбилиси полицияси кўзни ёшлантирувчи газ ва водомётлардан фойдаланган ҳолда намойишчиларни тарқатишга киришган. Намойишчилар полиция ходимларига шиша идишлар, “Молотов коктейли”ни улоқтирган. Маҳаллий вақт билан ярим тундан кейин улар парламент биноснига киришга уринган. Мамлакат ИИВнинг дастлабки маълумотларига кўра, 6 киши қўлга олинган.
Грузия президенти Саломе Зурабишвили намойишчиларни қўллаб-қувватлади. 7 март куни у Нью-Йоркдан туриб Грузия халқига мурожаат йўллаган. Президент “хорижий агентлар” тўғрисидаги қонунга вето қўйиш ҳуқуқидан фойдаланган. “Бу бугун ва эртага содир бўлмайди, аммо қонун лойиҳаси парламентдан чақириб олиниши керак”, — деган Зурабишвили.
Саломе Зурабишвили 2 март куни мазкур қонун лойиҳаси тарафдорларига ушбу ташаббус сабаб Грузия Европа Иттифоқи ва НАТОга қўшилиш номзодлигидан маҳрум бўлишига олиб келишини айтганди.
Изоҳ (0)