Gruziyada deputatlar 6-mart kuni xorijiy agentlar to‘g‘risidagi qonun loyihasini ko‘rib chiqish chog‘ida mushtlashdi. Bu haqda “Gruziya Online” xabar berdi.
Deputatlar uchrashuvi chog‘ida qo‘mita raisi Anri Oxanashvili va muxolifat deputatlari o‘rtasida og‘zaki kelishmovchilik yuzaga kelgan. Shundan keyin kelishmovchilik mushtlashuvga aylanib, parlament zaliga tarqagan.
“Vataning yo‘q, kimning manfaati uchun xizmat qilasan? Senda vatanparvarlik hissi yo‘q”, — degan Oxanashvili “Strategiya Agmashenebeli” partiyasi yetakchisi Giorgiy Vashadzega.
Barcha muxolifat deputatlari majlis zalini tark etishga majbur qilingan.
“Barcha muxolifat deputatlarini, jumladan ayollarni ham kuch bilan quvib chiqardik. Bino politsiya tomonidan o‘ralgan, jurnalistlarga kirishga ruxsat berilmagan, bu qonun allaqachon ishlay boshlaganini anglatadi”, — dedi muxolifatchi deputat Yeka Xerxeulidze.
Qonun loyihalari muhokamasi bilan bir vaqtda parlamentga tutash hududda norozilik aksiyasi bo‘lib o‘tmoqda. Namoyishchilar qonunning qabul qilinishiga qarshi. Avvalroq “Xalq kuchi” muxolifat harakati deputatlari Gruziya parlamentiga “Xorijiy ta’sirning shaffofligi to‘g‘risida”gi qonun loyihasini taqdim etgan.
Qonunda mamlakatda nodavlat notijorat tashkilotlari, ommaviy axborot vositalari va xorijiy davlatdan mablag‘ oluvchi subyektlar reestrini yaratish taklif etilmoqda.
Parlamentda ko‘pchilikni tashkil qiluvchi hukmron “Gruziya orzusi” partiyasi vakillari yangi qonun loyihasini qo‘llab-quvvatlash niyatida ekani, agar prezident Salome Zurabishvili veto qo‘ysa, deputatlar uni yengib o‘tishga harakat qilishini aytgan.
Izoh (0)