“Daryo” nashri 7-martda O‘zbekiston va jahonda sodir bo‘lgan eng muhim voqealarni e‘tiboringizga havola etadi.
Urush boshlansa, AQSHning Rossiyadan tashqari “yadroviy raqiblari” ham bormi?
“Yadroviy raqiblari” soni ortishi mumkinligi sabab AQSH zarur bo‘lgan yadro kallaklarining hisobini olishi kerak. Bu haqda AQSHning milliy xavfsizlik bo‘yicha sobiq maslahatchisi Jon Bolton The Washington Post gazetasida yozdi.
Uning so‘zlariga ko‘ra, Putin Strategik qurollarni qisqartirish bo‘yicha kelishuvda Rossiyaning ishtirokini to‘xtatish qaroridan so‘ng, Vashington endilikda nafaqat Moskva, balki Pekin ham uning yadroviy raqibi ekanligini tan olishi kerak.
Maslahatchining fikricha, Qo‘shma Shtatlar Rossiya bilan “yadroviy qarama-qarshilik”ga borishi mumkin va agar Vashington bu vaziyatda g‘olib chiqsa ham, u darhol Pekin bilan yadroviy ziddiyatga duch keladi.
“Vashington ikki raqibga qarshi turish uchun AQSHning yadroviy aktivlari qanchalik katta bo‘lishi kerakligi haqidagi asosiy savollarga javob berishi zarur”, — deb yozadi u.
Sobiq maslahatchining qo‘shimcha qilishicha, Vashington Shimoliy Koreya va “yadroviy qurol yaratishga intilayotgan” Eron Rossiya va Xitoyni ittifoqchi, AQSH va ularning hamkorlarini esa dushman deb bilishga moyilligini ham hisobga olishi lozim.
Nega Rossiyaga qurol yetkazmaslik sharti, Tayvanga sotilayotgan qurollarga amal qilmaydi?
Xitoy tashqi ishlar vaziri Sin Gan AQSHni Ukraina va Tayvanga nisbatan munosabati tufayli ikki tomonlama standartlarda ayblamoqda. Vazirning aytishicha, AQSH Xitoydan Ukrainadagi urush uchun Rossiyaga qurol yetkazib bermaslikni talab qilsa-da, ammo o‘zi Tayvanga qurol yetkazib bermoqda.
Bu muammoni dalillarga tayanib tahlil qiladigan bo‘lsak vaziyat quyidagicha:
Tashqi ishlar vaziri Singan: Ular nega Xitoydan Rossiyaga qurol yetkazib bermaslikni talab qilishmoqda, lekin o‘zlari 1982-yil 17-avgustdagi konsensusni buzib, anchadan beri Tayvanga qurol sotishmoqda?” — degan savolni o‘rtaga tashladi.
SinGan da‘vo qilayotgan masalada faktlar bilan tanishsak, AQSH ning ham bu borada tegishli qonuni bor va bu qonun 1982-yildan avvalroq kuchga kirgan. 1979-yilda yozilgan ushbu qonunga ko'ra, AQSH Tayvan xavfsizligiga tashqi tahdidlar yuzaga kelgan taqdirda, Vashington uni qurol-yarog‘ bilan ta’minlashi lozim .
So‘nggi paytlarda Xitoy Mudofaa vazirligi Tayvan uchun kurashishga tayyor ekanini bir necha bor ta’kidlagan, AQSH prezidenti Jo Bayden esa orolni harbiy yo‘l bilan himoya qilishga tayyorligi haqida gapirgan.
Tinch aholi jabrlanadigan mustaqil portlovchi aviabombalar so‘ralmoqda, sababi ulardan allaqachon foydalanilyapti
Ukraina hukumati ilk bor AQSHdan dronlardan tashlab portlatish uchun MK-20 kassetali aviabombalarni so‘radi. Bu haqda Reuters agentligi manbalariga tayanib, xabardor bo‘lamiz.
Ukraina fevral oyida Myunxen xavfsizlik konferensiyasida 155 ta kassetali artilleriya o‘qlariga qo‘shimcha ravishda MK-20 bombalarini so‘ragan.
Reuters xabariga ko‘ra, Kiyev kassetali o‘q-dorilar Ukraina sharqidagi rus qo‘shinlariga qarshi kurashda ustunlik berishiga umid qilmoqda.
Kiyev uzoq vaqt Vashingtondan bunday o‘qlarni olishga urinib ko‘rdi, ammo so‘rovlar rad etildi — AQSH qonunga muvofiq ushbu qurollarni eksport qila olmaydi.
Kassetali o‘q-dorilar katta hududlarga ta’sir qiluvchi ko‘plab kichikroq mustaqil portlovchi qurilmalarni olib yuradi. Ular tinch aholiga tahdid solib, katta maydonga beixtiyor zarba berishi mumkin ya’ni bunday o‘qlar uzoq yillar davomida portlamasligi mumkin va keyinchalik undan tinch aholi jabrlanadi.
Ushbu turdagi quroldan foydalanish 2010-yilda kuchga kirgan Kassetali o‘qlar to‘g‘risidagi konvensiya bilan taqiqlangan. Unga 123 ta davlat imzo chekkan. Shu bilan birga, AQSH, Ukraina va hatto Rossiya uning ishtirokchisi hisoblanmaydi.
Qo‘shma Shtatlar kassetali o‘q-dorilardan foydalanishni 2016-yildan boshlab to‘xtatgan. Xabarlarga ko‘ra, hozirda Rossiya Ukrainadagi urushda ushbu turdagi qurollardan faol foydalanmoqda.
O‘zbekistonda parlamentarizmning kuchayishi
Bugun Oliy Majlis Qonunchilik palatasida o‘zini o‘zi boshqarish organlari qo‘mitalarining qo‘shma yig‘ilishi bo‘lib o‘tmoqda
Yig‘ilishda ta’kidlanishicha, aholidan kelib tushgan takliflarning 18 mingtasi aynan parlamentni isloh qilish bilan bog‘liq.
Aytilishicha, O‘zbekistonda parlamentarizm va xalq hokimiyatchiligini kuchaytirishga qaratilgan bir qator normalar loyihaga kiritilmoqda.
Shuningdek, parlament faoliyati bilan bog‘liq konstitutsiyaviy islohotlarni amalga oshirishda Oliy Majlis palatalarining birgalikdagi vakolatlari qayta ko‘rib chiqilgan. Bunda Qonunchilik palatasi bilan Senatning birgalikdagi vakolatlari hamda har bir palataning alohida-alohida vakolatlari va mas’uliyat sohalari aniq belgilandi. Ya’ni Qonunchilik palatasining mutlaq vakolatlari 5 tadan 12 taga, Senatniki esa 14 tadan 18 taga ko‘paytirilyapti.
“Bu ikkala palataning mazkur yo‘nalishdagi samarali hamkorligini ta’minlagan holda korrupsiyaga qarshi kurashish borasida ijobiy o‘zgarishlar uchun zamin yaratadi”, — deyiladi xabarda.
Vakolatlarning amaldagi ijrosini kuzatamiz
Izoh (0)