Украинадаги уруш ўт очишни тўхтатиш ҳақидаги битим имзолангандан кейингина тугаши мумкин, деди Венгрия ташқи ишлар вазири Петер Сийярто SVT телеканали эфирида.
“Биринчи мақсад — одамларни ўлдиришни тўхтатиш, бу ўт очишни тўхтатиш бўйича келишувни англатади, бошқа нарса йўқ”, — деди у.
Унинг қайд этишича, Европа санкциялари можарони тўхтата олмайди.
Шунингдек, у Венгрия уруш томонларига қурол жўнатмаётгани, фақат тинчлик тарафдори эканини қўшимча қилди.
Февраль ойи охирида Хитой Ташқи ишлар вазирлиги Украинадаги можарони ҳал қилиш бўйича 12 банддан иборат режа эълон қилганди. Унда, жумладан, ҳарбий ҳаракатларни тўхтатиш, эскалациядан тийилиш, Москва ва Киев ўртасидаги музокараларни қайта бошлаш назарда тутилган эди. Ундан сал аввал Хитойнинг Бирлашган Миллатлар Ташкилотидаги доимий вакили Чжан Сзюан ўт очишни тўхтатишга чақирди.
Хитой режаси эълон қилинганидан сўнг Украина президенти офиси раҳбари Андрей Ермак Киев Пекин ташаббусига шубҳа билан қараётганини айтди.
“Россия сулҳдан ҳар доим можарони музлатиб туриш учун фойдаланади”, — деди у.
Украина президенти Владимир Зеленский Россия қўшинларининг мамлакат ҳудудидан олиб чиқилишини “ўт очишни тўхтатишнинг кафолатланган ва ишончли усули” деб атади.
Изоҳ (0)