Antarktida atrofidagi muz maydoni so‘nggi 44 yil ichida rekord darajada qisqardi. Bu qanday xavf tug‘diradi?

Antarktida atrofidagi muz maydoni 1979-yildan beri minimal darajaga qisqarib, 1,79 million kvadrat kilometrni tashkil etmoqda. Muz rekord darajada erimoqda va global iqlim o‘zgarishiga tahdid solmoqda. Bu haqda The Guardian xabar berdi.

25-fevralga kelib, ikki hafta ichida 136 ming kvadrat kilometr muz erib ketgan, bu Tasmaniya orolining maydonidan ikki barobar ko‘pdir. Tasmaniya universitetining Antarktika dengiz muzi bo‘yicha mutaxassisi Uill Xobbsning ta’kidlashicha, Antarktida muzlarining erishiga quyosh nuri sababchi emas.

“Dengiz muzi aks ettiruvchi bo‘lgani uchun uni quyosh nurlaridan erishi qiyin", — deydi Xobbs.

U va boshqa olimlarning ta’kidlashicha, yangi rekord olti yil ichida uchinchi marta yangilangan. Muz maydonining rekord darajada qisqarishi jahon okeani darajasining jiddiy ko‘tarilishi va global iqlim o‘zgarishi bilan tahdid solmoqda. Ilmiy hamjamiyat ko‘rayotgan asosiy tahdidlardan biri bu Amundsen dengizidagi Tueyts muzligi yoki “Qiyomat muzligi”dir. U eriganida, okean yarim metrga ko‘tarilishi mumkin.

“Antarktida bizga uzoqda bo‘lib tuyulishi mumkin, ammo u yerdagi o‘zgarishlar global iqlimga ta’sir qiladi va muz qatlamlarining erishi butun dunyo bo‘ylab qirg‘oq jamoalariga ta’sir qiladi. Hamma Antarktidada sodir bo‘layotgan voqealardan xavotirlanishi kerak”, — deydi Monash universiteti iqlimshunosi Arian Perich.