Gretsiyaning migratsiya ishlari bo‘yicha vaziri Notis Mitarakis Turkiya bilan quruqlik va dengiz chegarasida nazoratni kuchaytirishga chaqirdi. Gretsiya hukumati Turkiya janubi-sharqida va Suriya shimolidagi dahshatli zilzilalardan so‘ng o‘z uylarini tark etgan qochqinlarning yangi to‘lqinini kutmoqda, deb xabar berdi The Guardian nashri.
Xususan, chegarada kuzatuv tizimi kuchaytirilib, qo‘shimcha panjaralar o‘rnatilgan. Yuzlab chegarachilar Gretsiya—Turkiya quruqlik chegarasini qo‘riqlash uchun Evros mintaqasida patrullik qilmoqda.
“Millionlab odamlarning ommaviy ko‘chirilishi muammoning yechimi emas. Bu sodir bo‘lishidan oldin Turkiya va Suriyaga favqulodda yordam yuborilishi kerak”, — dedi Mitarakis.
Nashrning yozishicha, 2023-yil boshida Gretsiya hukumati Turkiya bilan Evros daryosi bo‘ylab butun chegarada to‘siq qurishga qaror qilgan. Chegarada to‘siq qurilishi 2020-yilda, Gretsiya—Turkiya chegarasidagi vaziyat keskinlashganidan keyin boshlangandi.
2021-yilga kelib, grek tomoni 40 kilometr to‘siq qurishga muvaffaq bo‘ldi. Afina Turkiyani mamlakatdagi vaziyatni beqarorlashtirish uchun Gretsiyaga ataylab muhojirlarni jo‘natganlikda aybladi. 2022-yilda Gretsiya chegara nazorati Turkiyadan 256 ming muhojirning mamlakatga noqonuniy kirishini to‘xtatib qoldi.
O‘tgan haftada Yevropa chegaralarini boshqarish bo‘yicha konferensiyada Mitarakis quruqlikdagi chegara bo‘ylab bahsli to‘siqni kengaytirishni davom ettirishiga va’da berdi. Yil oxirigacha balandligi 5 metr bo‘lgan to‘siq ikki baravar ko‘paytirilishi rejalashtirilgan.
“To‘siq Evros daryosining butun uzunligi bo‘ylab cho‘ziladi, shunda biz Yevropa qit’asini noqonuniy muhojirlar oqimidan himoya qila olamiz”, — dedi u.
Turkiya va Suriyadagi zilzilalardan keyin Yevropaga borishga harakat qilayotgan qochqinlar nafaqat Gretsiya, balki Italiyaga ham yo‘l olmoqda. 26-fevral kuni Italiyaning Kalabriya qirg‘oqlari yaqinida kema qoyalarga urilishi oqibatida 59 nafar qochqin, jumladan, 12 nafar bola halok bo‘ldi. Omon qolganlarning so‘zlariga ko‘ra, Turkiyadan jo‘nab ketgan kema bortida 150 nafargacha odam bo‘lgan. Reuters xabariga ko‘ra, 81 kishi tirik qolgan, 20 kishi jarohat olgan.
Izoh (0)