COVID-19 Xitoy laboratoriyasidan sizib chiqqan bo‘lishi mumkinligini da’vo qilib, Xitoyni obro‘sizlantirishni va koronavirusning kelib chiqishini siyosiylashtirishni bas qilish zarur, dedi Xitoy Tashqi ishlar vazirligi matbuot kotibi Mao Nin brifingda. Uning so‘zlari vazirlik saytida keltirilgan.
Diplomat Jahon sog‘liqni saqlash tashkiloti (JSST) va Xitoyning qo‘shma ilmiy guruhi koronavirusning bunday usulda tarqalgani dargumon degan xulosaga kelganini, xalqaro va ilmiy hamjamiyat bu xulosaga qo‘shilganini eslatdi.
O‘tgan hafta The Wall Street Journal nashri AQSH Energetika vazirligi koronavirus Xitoy laboratoriyasidan sizib chiqish orqali tarqalgan, deb hisoblayotgani haqida yozgandi. Ilgari shunga o‘xshash nazariya AQSH hukumatining milliy laboratoriyasi tomonidan “ishonchli” deb atalgan, uni FQB ham qo‘llab-quvvatlagan, ammo milliy razvedka bu versiyaga shubha bildirgan. Yana to‘rtta razvedka agentligi virusning tabiiy kelib chiqishi haqidagi nazariyani qo‘llab-quvvatlamoqda, ikkitasi bir qarorga kelmagan, deya ta’kidlaydi gazeta. Oq uy matbuot kotibi Jon Kirbi fevral oyi oxirida “Hozirda AQSH hukumatida COVID-19 aniq qanday boshlangani bo‘yicha konsensus yo‘q”, degandi.
JSST pandemiya boshlanganidan keyin infeksiyaning kelib chiqishini tekshirishni boshlagandi. Mavjud ma’lumotlarga asoslanib, JSST ekspertlari laboratoriyadan sizib chiqish ehtimolini “juda kam” deb baholadi.
Pekin JSSTga laboratoriya versiyasini tekshirishda yordam berishdan bosh tortdi va tashkilotni siyosiy pozitsiyada aybladi. JSST rahbari Tedros Adxanom Gebreyesus virus Xitoy laboratoriyasidan tarqalgan bo‘lishi mumkinligini tan oldi: “Men o‘zim laborantman, immunologman, laboratoriyada ishlaganman va laboratoriyada bunday hodisalar bo‘lib turishini bilaman”. Virusning kelib chiqishi bo‘yicha keyingi JSST tadqiqotlari Xitoyning qarshiligi tufayli to‘xtatildi.
Izoh (0)