Afg‘onistonning Tehrondagi elchixonasi Kobulda bir yarim yildan buyon hokimiyatni nazorat qilib kelayotgan “Tolibon”ga rasman topshirildi. “Tolibon” vakillari elchixonada 27-fevraldan ishlay boshlagan, deb xabar bermoqda TOLOnews telekanali.
Afg‘onistonning avvalgi hukumati tomonidan tayinlangan diplomatik missiya a’zolari elchixonani tark etgan.
“Tolibon” yetti nafar xodimni Tehronga elchixonada ishlash uchun yuborgan. Ularga Fazl Muhammad Haqqoniy boshchilik qilmoqda. U elchi maqomiga ega emas, chunki Eron “Tolibon” hukumatini tan olmagan. Shu sababdan uning lavozimi “Afg‘oniston diplomatik missiyasining muvaqqat ishlar vakili” deb ataladi.
Eron tashqi ishlar vazirligi Afg‘oniston elchixonasi xodimlarining almashtirilishiga Eron rasmiylarining aloqasi yo‘qligini aytdi va buni Afg‘onistonning ichki muammosi deb atadi.
Bundan tashqari, TOLOnews agentligi Afg‘oniston TIV vakiliga tayanib, Afg‘onistonning Istanbuldagi konsulxonasi ham “Tolibon” nazoratiga o‘tganini xabar qildi.
“Tolibon” 2021-yilning avgust oyidan beri Afg‘onistonda nazorat o‘rnatganiga qaramay, ularning hukumatini dunyoning hech bir davlati tan olmagan. Biroq avvalroq Afg‘onistonning Rossiya, Xitoy, Turkmaniston va Pokistondagi elchixonalarida harakat vakillari ish boshlagan edi.
Izoh (0)