Грециянинг миграция ишлари бўйича вазири Нотис Митаракис Туркия билан қуруқлик ва денгиз чегарасида назоратни кучайтиришга чақирди. Греция ҳукумати Туркия жануби-шарқида ва Сурия шимолидаги даҳшатли зилзилалардан сўнг ўз уйларини тарк этган қочқинларнинг янги тўлқинини кутмоқда, деб хабар берди The Guardian нашри.
Хусусан, чегарада кузатув тизими кучайтирилиб, қўшимча панжаралар ўрнатилган. Юзлаб чегарачилар Греция—Туркия қуруқлик чегарасини қўриқлаш учун Эврос минтақасида патруллик қилмоқда.
“Миллионлаб одамларнинг оммавий кўчирилиши муаммонинг ечими эмас. Бу содир бўлишидан олдин Туркия ва Сурияга фавқулодда ёрдам юборилиши керак”, — деди Митаракис.
Нашрнинг ёзишича, 2023 йил бошида Греция ҳукумати Туркия билан Эврос дарёси бўйлаб бутун чегарада тўсиқ қуришга қарор қилган. Чегарада тўсиқ қурилиши 2020 йилда, Греция—Туркия чегарасидаги вазият кескинлашганидан кейин бошланганди.
2021 йилга келиб, грек томони 40 километр тўсиқ қуришга муваффақ бўлди. Афина Туркияни мамлакатдаги вазиятни беқарорлаштириш учун Грецияга атайлаб муҳожирларни жўнатганликда айблади. 2022 йилда Греция чегара назорати Туркиядан 256 минг муҳожирнинг мамлакатга ноқонуний киришини тўхтатиб қолди.
Ўтган ҳафтада Европа чегараларини бошқариш бўйича конференцияда Митаракис қуруқликдаги чегара бўйлаб баҳсли тўсиқни кенгайтиришни давом эттиришига ваъда берди. Йил охиригача баландлиги 5 метр бўлган тўсиқ икки баравар кўпайтирилиши режалаштирилган.
“Тўсиқ Эврос дарёсининг бутун узунлиги бўйлаб чўзилади, шунда биз Европа қитъасини ноқонуний муҳожирлар оқимидан ҳимоя қила оламиз”, — деди у.
Туркия ва Суриядаги зилзилалардан кейин Европага боришга ҳаракат қилаётган қочқинлар нафақат Греция, балки Италияга ҳам йўл олмоқда. 26 февраль куни Италиянинг Калабрия қирғоқлари яқинида кема қояларга урилиши оқибатида 59 нафар қочқин, жумладан, 12 нафар бола ҳалок бўлди. Омон қолганларнинг сўзларига кўра, Туркиядан жўнаб кетган кема бортида 150 нафаргача одам бўлган. Reuters хабарига кўра, 81 киши тирик қолган, 20 киши жароҳат олган.
Изоҳ (0)