Qirg‘izistonning qochqinlikdagi sobiq prezidenti Qurmanbek Bakiyev amaldagi davlat rahbari Sadir Japarovning tashabbusi bilan Dubayda o‘tkazilgan sobiq prezidentlar uchrashuviga fikr bildirdi.
Uning fikricha, Sadir Japarov qiyin, ammo to‘g‘ri yo‘lni tanlagan.
“Bu tashabbus uning siyosatchi sifatida yetukligini ko‘rsatadi, u nafaqat mamlakatimiz, balki butun dunyo uchun xavfli vaziyatda jamiyatni birlashtirishga urinmoqda. U barcha masalada sobiq prezidentlarni ayblab, tanqid qilib, populizm yo‘lini tanlashi mumkin edi, lekin Japarov to‘g‘ri yo‘lni tanladi, garchi bu oson bo‘lmasa-da. Bu uning ham shaxs sifatida, ham siyosiy jihatdan o‘sganidan dalolat beradi”, — dedi Bakiyev.
Unga ko‘ra, barcha sobiq prezidentlar Japarovning tashabbusini qo‘llab-quvvatlagan va “shaxsiy kelishmovchiliklarni chetga surib, ish haqida o‘ylashga” qaror qilgan.
Qochqin prezident, shuningdek, 2010-yil 7-apreldagi odamlarning o‘limida “uning hech qanday aybi yo‘qligini” aytdi.
“2010-yil 7-aprelda Bishkekda va iyun oyida janubda qurbon bo‘lganlarning o‘limiga kim javobgar ekanini tahlil qilishni istamayman, lekin bu mening aybim emas. Men ushbu va boshqa tegishli masalalar bo‘yicha tergov yoki sud jarayonlarida ishtirok etishga tayyor ekanligimni bir necha bor aytganman”, — dedi u.
Bakiyev aprel voqealari, uning boshqaruviga qarshi chiqqan namoyishchilarning otib tashlanishi bo‘yicha asosiy ayblanuvchi hisoblanadi. U Qirg‘izistonda 30 yillik qamoq jazosiga hukm qilingan. Avvalroq Japarov agar Bakiyev Qirg‘izistonga kelsa, qamoqqa olinishi kerakligini aytgandi.
Eslatib o‘tamiz, Qirg‘izistonning amaldagi prezidenti Sadir Japarov 18-fevral kuni Qirg‘izistonning barcha prezidentlarini bir joyga yig‘ib, uchrashuv o‘tkazdi. Unda Asqar Akayev, Qurmanbek Bakiyev, Roza O‘tunboyeva, Almazbek Atambayev va So‘ronbay Jeenbekov ishtirok etgan. Japarov sobiq prezidentlar o‘z e’tirozlari, alamlarini bildirgani, shu bilan birga, xatolarini tan olib, bir-birini kechirganini aytgandi. Atambayev, Akayev va Jeenbekov uchrashuvga o‘z munosabatini bildirgan.
Izoh (0)