Surxondaryo viloyatining Oltinsoy va Termiz tumanlarida kredit mablag‘larini o‘zlashtirgan MCHJ rahbarlari aniqlandi, deb xabar beradi Bosh prokuratura huzuridagi departament.
Qayd etilishicha, departamentning Oltinsoy tuman bo‘limi tomonidan o‘tkazilgan tergovga qadar tekshiruvda, “O.B.” MCHJ rahbari R.H. bog‘ tashkil etish va qishloq xo‘jaligi texnikalari sotib olish uchun tijorat banki filialidan ajratilgan imtiyozli kredit evaziga hududda bog‘ tashkil etmasdan, ushbu mablag‘larni boshqa maqsadlarda sarflab, jami 6,1 milliard so‘mni o‘zlashtirish yo‘li bilan talon-toroj qilgan.
Shuningdek, departamentning Termiz tuman bo‘limi tomonidan o‘tkazilgan tergovga qadar tekshiruvda, “B-N.” va “Ch-P.” MCHJlar rahbari U.X. hududiy tijorat banki filialidan kredit mablag‘lari ajratilishiga erishgan. U mazkur mablag‘lar evaziga qo‘shni Qozog‘istondan olib kelingan chorva mollarni boshqa shaxslarga sotib yuborib, jami 5,1 milliard so‘m kredit mablag‘ini o‘zlashtirish yo‘li bilan talon-toroj qilgani, shu bilan birga, 102,1 million so‘m qo‘shimcha soliq va boshqa majburiy to‘lovlarni to‘lashdan bo‘yin tovlab kelgani aniqlangan.
Mazkur holatlar yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish), 181-1-moddasi (qasddan bankrotlikka olib kelish) va 184-moddasi (soliqlar yoki yig‘imlarni to‘lashdan bo‘yin tovlash) bilan jinoyat ishlari qo‘zg‘atilib, tergov harakatlari o‘tkazilmoqda.
Avvalroq Qashqadaryoda hokim yordamchisi 160 mln so‘mdan ortiq kredit mablag‘ini o‘zlashtirgani aniqlangani to‘g‘risida xabar berilgandi.
Izoh (0)