Qashqadaryo viloyati Shahrisabz tumanida hokim yordamchisi 160 mln so‘mdan ortiq kredit mablag‘ini o‘zlashtirgani aniqlandi. Bu haqda Korrupsiyaga qarshi kurashish agentligi axborot xizmati xabar berdi.
Xabarga ko‘ra, holat Bosh prokuratura huzuridagi Iqtisodiy jinoyatlarga qarshi kurashish departamentining Shahrisabz tumani bo‘limi tomonidan o‘tkazilgan tergovga qadar tekshiruvda aniqlangan. “B.S.B.” MCHJ ta’sischisi va rahbari A.O‘. bir paytning o‘zida tumanda mahallada hokim yordamchisi lavozimida ishlayotganidan foydalangan holda 114 million so‘m soliq va yig‘imlarni to‘lashdan bo‘yin tovlagan.
Shuningdek, tijorat bankining Shahrisabz filiali mansabdor shaxslari bilan jinoiy til biriktirgan holda hujjatlarni soxtalashtirish orqali 162 million so‘m kredit mablag‘larini o‘zlashtirish yo‘li bilan talon-toroj qilgani aniqlangan.
Mazkur holat bo‘yicha unga nisbatan Jinoyat kodeksining 184-moddasi 2-qismi “b” bandi (soliqlar yoki yig‘imlarni to‘lashdan bo‘yin tovlash), 167-moddasi 3-qismi “a” bandi (o‘zlashtirish yoki rastrata yo‘li bilan talon-toroj qilish) va 209-moddasi 1-qismi (mansab soxtakorligi) bilan hamda tijorat bankining Shahrisabz filiali mansabdor shaxslariga nisbatan 167-moddasi 3-qismi “a” bandi va 228-moddasi 2-qismi “b” bandi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishi qo‘zg‘atilgan. Hozirda tergov harakatlari olib borilmoqda.
Izoh (0)