Сурхондарё вилоятининг Олтинсой ва Термиз туманларида кредит маблағларини ўзлаштирган МЧЖ раҳбарлари аниқланди, деб хабар беради Бош прокуратура ҳузуридаги департамент.
Қайд этилишича, департаментнинг Олтинсой туман бўлими томонидан ўтказилган терговга қадар текширувда, “О.Б.” МЧЖ раҳбари Р.Ҳ. боғ ташкил этиш ва қишлоқ хўжалиги техникалари сотиб олиш учун тижорат банки филиалидан ажратилган имтиёзли кредит эвазига ҳудудда боғ ташкил этмасдан, ушбу маблағларни бошқа мақсадларда сарфлаб, жами 6,1 миллиард сўмни ўзлаштириш йўли билан талон-торож қилган.
Шунингдек, департаментнинг Термиз туман бўлими томонидан ўтказилган терговга қадар текширувда, “Б-Н.” ва “Ч-П.” МЧЖлар раҳбари У.Х. ҳудудий тижорат банки филиалидан кредит маблағлари ажратилишига эришган. У мазкур маблағлар эвазига қўшни Қозоғистондан олиб келинган чорва молларни бошқа шахсларга сотиб юбориб, жами 5,1 миллиард сўм кредит маблағини ўзлаштириш йўли билан талон-торож қилгани, шу билан бирга, 102,1 миллион сўм қўшимча солиқ ва бошқа мажбурий тўловларни тўлашдан бўйин товлаб келгани аниқланган.
Мазкур ҳолатлар юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш), 181-1-моддаси (қасддан банкротликка олиб келиш) ва 184-моддаси (солиқлар ёки йиғимларни тўлашдан бўйин товлаш) билан жиноят ишлари қўзғатилиб, тергов ҳаракатлари ўтказилмоқда.
Аввалроқ Қашқадарёда ҳоким ёрдамчиси 160 млн сўмдан ортиқ кредит маблағини ўзлаштиргани аниқлангани тўғрисида хабар берилганди.
Изоҳ (0)