DXX Sirdaryoda yo‘l qurilishida 1 mlrd so‘m o‘zlashtirilganini aniqladi

Sirdaryodagi yo‘l qurilishida 1 milliard so‘m budjet mablag‘i o‘zlashtirilgani aniqlandi, deb xabar bermoqda Davlat xavfsizlik xizmati.

Ta’kidlanishicha, xizmatning Sirdaryo viloyati bo‘yicha boshqarmasi va Xovos transport prokuraturasi hamkorligida yo‘l infratuzilmasi obyektlarida qonun buzilishi holatlarini aniqlash yuzasidan tezkor tadbirlar olib borilgan. Natijada “Sirdaryo yo‘llardan muntazam foydalanish” unitar korxonasining sobiq mansabdor shaxslari tomonidan 2018—2021-yillarda avtomobil yo‘llarini ta’mirlash uchun ajratilgan budjet mablag‘lari, ishchi xodimlarning ish haqlari va rag‘batlantirish pullari — jami 1 milliard 6 million 792 ming 703 so‘m talon-toroj qilingani aniqlandi.

Holat yuzasidan Jinoyat kodeksining tegishli moddalari bilan jinoyat ishi qo‘zg‘atilib, tergov harakatlari olib borildi hamda unitar korxonaning sobiq rahbari “X.O.”, sobiq bosh hisobchisi “S.SH.”, sobiq hisobchisi “X.S.”, sobiq bo‘lim boshlig‘i “M.SH.” va yana 10 nafar shaxsga nisbatan ayblov e’lon qilinib, sud idoralariga yuborildi.

Jinoyat ishlari bo‘yicha Sayxunobod tumani sudining hukmiga ko‘ra, aybdorlarga ozodlikdan mahrum qilish, axloq tuzatish ishlari hamda qonunchilikda belgilangan boshqa jazo turlari tayinlandi. Talon-toroj qilingan pullardan 767 million 753 ming 402 so‘mi sud va tergov davrida davlat foydasiga undirildi, qolgan 239 million 039 ming 301 so‘mi Majburiy ijro byurolariga majburiy tartibda undirish uchun yuborildi.