Qozog‘istonning Akto‘be viloyati qutqaruvchilari 24-fevral kuni yo‘llardagi ko‘ruvchanlik yomonlashgani sabab yuk mashinalari va yo‘lovchi transportlaridan jami 93 kishini evakuatsiya qildi, deb xabar beradi “Zakon.kz”.
Qayd etilishicha, evakuatsiya qilinganlar orasida O‘zbekiston va Tojikiston fuqarolari bor.
“24-fevral kuni soat 22:50 da Samara—Chimkent avtomobil yo‘lining 964-kilometrida Bishkekdan Moskvaga yo‘l olgan Yutong avtobusi “Qorabutak” aholi punktiga qadar kuzatib qo‘yilgan.
Isinib olish punktiga 41 nafar O‘zbekiston va Tojikiston fuqarolari evakuatsiya qilindi”, — deyiladi xabarda.
Shuningdek, viloyatda yana 54 kishi isinish punktlariga yetkazilgan bo‘lib, ularning 52 nafari O‘zbekiston fuqarolaridir. Setra avtobusi yo‘lovchilari transport vositasining nosozligi sabab yo‘lda qolib ketgan. Ular Chimkentdan Moskvaga ketayotgan bo‘lgan.
Eslatib o‘tamiz, 2020-yilning martida Qozog‘istonda 26 nafar o‘zbekistonlik bo‘lgan avtobus ag‘darilib ketgan, 2019-yilda Qozog‘istonda Rossiyadan qaytayotgan o‘zbekistonliklar ishtirokida YTH sodir bo‘lishi oqibatida bir kishi halok bo‘lgan, 2018-yil yanvarida Aqto‘be viloyati hududida ichida O‘zbekiston fuqarolari bo‘lgan avtobus yonib ketgan va 52 o‘zbekistonlik halok bo‘lgan edi.
Izoh (0)