Qonunchilik palatasi kengashining va Senat kengashining hududlarda aholi bandligini ta’minlash borasida amalga oshirilayotgan ishlar yuzasidan parlament nazoratining samaradorligini oshirish yuzasidan qo‘shma qarori qabul qilindi.
Mamlakatda ishsiz fuqarolarning, ayniqsa, xotin-qizlar va mehnat bozoriga ilk bor kirib kelayotgan bitiruvchilarning bandligini ta’minlash va ularni tadbirkorlikka keng jalb etish, shuningdek, norasmiy bandlikni kamaytirish bo‘yicha yangi ta’sirchan mexanizmlar joriy etilishi natijasida 2022-yil davomida doimiy, vaqtinchalik va mavsumiy ishlarda jami 6 milliondan ziyod aholining bandligi ta’minlangan.
Jumladan, investitsiya loyihalarini amalga oshirish hisobiga 305 ming, qurilishda 139 ming, qishloq xo‘jaligida 3,3 mln, moliya-iqtisod, tadbirkorlik va kambag‘allikni qisqartirish yo‘nalishida 2,6 million hamda turizm va madaniyat yo‘nalishida 344 ming kishi band bo‘lgan. Ayniqsa, paxta va g‘alladan qisqartirilgan 100 ming gektar yerni ochiq elektron tanlov orqali fuqarolarga ajratib berish hisobiga 1,3 milliondan ortiq kishi ish bilan ta’minlangan. Shu davrda 200 mingga yaqin tadbirkorlik subekti tashkil qilingan, 10 mingta korxona faoliyati kengaytirilgan, 11 mingta korxona quvvati tiklangan.
Oilaviy tadbirkorlikni rivojlantirish dasturlari doirasida hokim yordamchilarining tavsiyalari asosida qariyb 10 trillion so‘m kredit mablag‘lari ajratilishi natijasida o‘tgan yilning o‘zida kambag‘allik darajasi 17 foizdan 14 foizga tushirilgani, bunda hokim yordamchilari 1 million nafar aholini kasb-hunarga o‘qitib, tadbirkorlikni boshlashga ko‘maklashgani, daromadli ish bilan band qilgani muhim omil bo‘lgan.
Bu boradagi ishlar o‘tgan yil davomida O‘zbekiston Respublikasi Oliy Majlisi Qonunchilik palatasi va Senati tomonidan parlament nazorati doirasida palatalar majlislarida muhokama qilinib, Bosh vazir o‘rinbosarlarining hamda tegishli vazirlik va idoralar, hududlar mutasaddilarining axborotlari eshitilgan, shuningdek, 20 ga yaqin tizimli muammo va kamchiliklarni bartaraf etish bo‘yicha hukumatga takliflar berilgan.
Joriy yilda 5 million kishi bandligini ta’minlash, shu jumladan 2 million doimiy ish o‘rni yaratish, 1 million kishini kambag‘allikdan chiqarish yuzasidan tarmoq va hudud rahbarlari tomonidan zarur chora-tadbirlar ko‘riladi. Mazkur vazifalarni o‘z vaqtida va samarali tarzda bajarilishi yuzasidan parlament nazorati samaradorligini yanada oshirish maqsadida qo‘shma qaror bilan bir qator chora-tadbirlar belgilandi.
Xususan, hududlarda aholi bandligini ta’minlash borasida amalga oshirilayotgan ishlar samaradorligini o‘rganish bo‘yicha yo‘l xaritasi tasdiqlandi hamda Oliy Majlis Qonunchilik palatasi deputatlari va Senati a’zolaridan iborat tarkibda ishchi guruh tuzildi. Ishchi guruh zimmasiga reja-jadval asosida har oyda hududlarga chiqib, aholi bandligini ta’minlash hududiy dasturlarining tasdiqlanishi hamda amalga oshirilishi ustidan ta’sirchan parlament nazoratini olib borish, aniqlangan muammolarni tegishli vazirliklar va idoralar bilan hamkorlikda joyida hal etish, tizimli kamchiliklarni bartaraf qilish bo‘yicha takliflar tayyorlash vazifalari belgilandi.
Parlament a’zolari tomonidan O‘zbekistonda aholi bandligini ta’minlash borasida amalga oshirilayotgan islohotlar, qabul qilinayotgan normativ-huquqiy hujjatlarining mazmun-mohiyati va ahamiyati haqida keng tushuntirish-targ‘ibot ishlari olib boriladi. Parlament nazorati tadbirlarining natijalari Qoraqalpog‘iston Respublikasi Jo‘qorg‘i Kengesi, xalq deputatlari viloyatlar va Toshkent shahar Kengashlari sessiyalarida muhokama qilinadi. Shuningdek, yo‘l xaritasida bandlik dasturlarining ijrosi, sohadagi mavjud tizimli muammolar atroflicha ko‘rib chiqilib, ularni hal etish bo‘yicha mutasaddi vazirlik va idoralar hamda hudud rahbarlarining axborotlari Oliy Majlis palatalari hamda ularning tegishli qo‘mitalarining qo‘shma majlislarida eshitib boriladi.
Izoh (0)