Malayziyaga boradigan O‘zbekiston fuqarolaridan 30 kungacha viza talab qilinmaydigan bo‘ldi. Bu haqda mamlakatning Toshkentdagi elchixonasi ma’lum qildi.
Qayd etilishicha, hozirgi vaqtda Malayziyaga kirish uchun O‘zbekiston fuqarolariga 30 kungacha viza talab qilinmaydi. Malayziyaning migratsiya qonunchiligiga muvofiq O‘zbekistondan tashrif buyurayotgan fuqarolar quyidagilarni taqdim etishlari shart:
- amal qilish muddati 6 oydan kam bo‘lmagan xorijga chiqish pasporti;
- mazkur davlatga kirgan sanadan boshlab 30 kun ichida qaytish yoki uchinchi davlatga borish aviachiptasi.
Shuningdek, pasport nazoratidan o‘tayotganda fuqarolardan mehmonxona (yotoqxona)ni band qilgani to‘g‘risida hujjat va mamlakatda bo‘lishlari uchun yetarli mablag‘ mavjudligini tasdiqlash talab qilinishi mumkin
Zarur hollarda, Malayziya IIV Migratsiya departamenti vakillari chegara o‘tish joylarida (Kuala-Lumpur xalqaro aeroporti va boshqalar) chet el fuqarolariga mamlakatga kirishni rad etish huquqiga ega.
Yuqoridagilardan kelib chiqqan holda, O‘zbekistonning Kuala-Lumpur shahridagi elchixonasi Malayziyaga sayyohat qilishni rejalashtirayotgan vatandoshlarni mahalliy hokimiyat organlarining yuqoridagi talablarini inobatga olishga chaqiradi.
Welcoming Countries Rank-2023 reytingida O‘zbekiston Markaziy Osiyodagi eng mehmondo‘st davlat deb topilgandi. Reytingni tuzishda qancha fuqarolarning mamlakatga vizasiz kirishi yoki uni kelganida olishi mumkinligi hisobga olingan. Respublikaga 139 davlat fuqarolari vizasiz rejimda tashrif buyurishi mumkin.
Izoh (0)