AQSH Shimoliy qo‘mondonligining qiruvchi samolyotlari avvalroq mamlakat havo hududida aniqlangan Xitoy sharini urib tushirdi, deb xabar bermoqda CNN.
Shar Janubiy Karolina qirg‘oqlari yaqinida Atlantika okeani ustida parvoz qilayotgan payt unga qarata raketa uchirildi. Operatsiya boshlanishidan avval AQSH Federal aviatsiya boshqarmasi Shimoliy va Janubiy Karolinadagi uchta aeroportning faoliyatini vaqtincha to‘xtatdi.
Pentagonning taʼkidlashicha, AQSH prezidenti Jo Bayden Xitoy sharini urib tushirishni 1-fevral kuni buyurgan, biroq Mudofaa vazirligi xavfsizlik nuqtayi nazaridan havo shari AQSHning suvli hududi ustidan oʻtishini kutgan.
Harbiy vazirlikning da’vo qilishicha, Xitoy shardan Qo‘shma Shtatlardagi strategik obyektlarni kuzatish uchun foydalangan. XXR esa havo shari meteorologik maqsadlarda uchirilganini iddao qilmoqda.
Xitoy Tashqi ishlar vazirligi “AQSHning fuqarolik uchuvchisiz uchar sharga hujum uchun kuch ishlatganidan” norozilik bildirdi. “Xitoy tekshiruvdan soʻng Amerika tomonini bir necha bor havo sharidan fuqarolik maqsadlarida foydalanilgani va fors-major holatlari tufayli u AQSH havo hududiga kirib qolgani toʻgʻrisida ogohlantirgandi, bu mutlaqo kutilmagan holat”, — deyiladi TIV bayonotida. Diplomatlarning qo‘shimcha qilishicha, XXR keyingi zarur javoblar berish huquqini o‘zida saqlab qoladi va o‘zining qonuniy huquq va manfaatlarini qat’iy himoya qiladi.
Izoh (0)