Rossiya tomonidan okkupatsiya qilingan Qrimda partizanlar mahalliy aholiga rus qo‘shinlari to‘plangan joylar haqida xabar berishni so‘rab murojaat qildi. Bu haqda Qrim partizanlarining Telegram-kanalida ma’lum qilindi.
“Agar siz Rossiya texnikasi, ayniqsa Qrimning shimolida to‘planganini ko‘rsangiz, chat-botimizga ularning joylashuvini aniq koordinatalari bilan, iloji bo‘lsa fotosurat va texnikalar miqdori, ularning holati tavsifi bilan yuboring”, — deb so‘ramoqda partizanlar.
Ular Rossiya armiyasi shaxsiy tarkibining joylashuv nuqtalarini belgilash muhimligini ta’kidlagan.
“Bizga yana shu ma’lumki, Jankoy tumanda bosqinchilar o‘z texnikalarini taʼmirlash bazalariga ega, ular haqidagi maʼlumotlar va ularning joylashuvi ham juda zarur. Bosqinchilar ustidan umumiy g‘alaba qozonishimiz birgalikdagi harakatlarimizga bog‘liq”, — deydi Qrim partizanlari murojaati yakunida.
Ukraina rasmiylari Rossiya bilan urush faqatgina rus qo‘shinlari bosib olingan barcha hududlardan, jumladan, 2014-yilda anneksiya qilingan Qrimdan olib chiqib ketilgandan keyingina tugashini bir necha bor taʼkidlagan. Ukraina hukumati vakillari Qrimni qaytarish bo‘yicha ehtimoliy harbiy operatsiya haqida muntazam gapirib keladi.
AQSH Qrimni Ukraina hududi deb biladi. Shu bilan birga, Rossiyaning Ukrainaga keng ko‘lamli bosqinidan so‘ng Vashington Kiyevga yarimoroldagi nishonlarga zarba bera oladigan vositalarni taqdim etishdan bosh tortdi. Ammo yanvar oyida The New York Times gazetasi AQSH prezidenti ma’muriyati bu masala bo‘yicha o‘z pozitsiyasini asta-sekin yumshatib borayotgani haqida xabar berdi.
Izoh (0)