AQSH osmonida razvedkachi havo shari aniqlandi. Pentagon sharni Xitoyga tegishli deb hisoblamoqda (video)

AQSH harbiylari so‘nggi bir necha kun davomida mamlakatning shimoliy qismida razvedkachi havo sharini kuzatmoqda. Bu haqda Pentagon matbuot kotibi Patrik Rayderga tayanib, CNN xabar berdi.

“Ushbu razvedka shari Xitoyga tegishli ekaniga ishonchimiz komil. So‘nggi bir necha yil ichida biz bunday harakatlarni kuzatganmiz”, — dedi Pentagon vakili.

Rayderning qayd etishicha, AQSH rasmiylari havo sharini urib tushirish niyatida emas, chunki u uchish balandligi tomondan fuqaro aviatsiyasi uchun xavf tug‘dirmaydi. Shuningdek, harbiylar sharni razvedka nuqtayi nazaridan ham xavfli emas deb hisoblamoqda, chunki Xitoy sun’iy yo‘ldoshlari allaqachon ekvivalent ma’lumotlarni uzatgan.

🚨#BREAKING: More video of the Chinese spy balloon⁰
📌#Montana | #USA

More video is coming out as
The Chinese high altitude surveillance balloon was seen over Billings Montana yesterday.
The size of balloon is three buses wide and has been flying over the Northern U.S. for days pic.twitter.com/4iUVvJQCG8

— R A W S A L E R T S (@rawsalerts) February 2, 2023

Shunga qaramay, Amerika rasmiylari Xitoy hukumati bilan “Vashington va Pekindagi bir nechta kanallar orqali” aloqaga chiqqan.

Sharning hozirgi joylashuv nuqtasi noma’lum. Rayderning ta’kidlashicha, u “bir qancha maxfiy joylar” ustidan uchib o‘tgan. Avvalroq NBC havo sharini 31-yanvar kuni Montana shtatining Billings shahrida ko‘rishgani haqida xabar bergandi. Bungacha u Kanada va Aleut orollari ustidan parvoz qilgan.

Xitoy va AQSH o‘rtasidagi munosabatlar AQSH Kongressi spikeri Nensi Pelosi 2022-yil avgust oyida Xitoy hukumati o‘z hududi deb biladigan Tayvanga tashrif buyurganidan keyin keskinlashdi.

Yanvar oyi oxirida AQSH harbiy-havo kuchlari generali Mayk Minixan Xitoy va AQSH o‘rtasida Tayvan uchun urush 2025-yilda boshlanishi mumkinligini aytdi.