Ruminiyalik seysmolog Aleksandr Kendzera Ukraina ham Turkiya kabi seysmik faol zonada joylashganini va mamlakatda 8 balli zilzila yuz berishi mumkinligini aytdi. Bu haqda UNIAN xabar berdi.
Mutaxassisning so‘zlariga ko‘ra, zilzilaning oldini olish imkoniyati yo‘q.
“Seysmik faol kamar Yevrosiyo plitasi arab plitasi, Afrika plitasi va ular o‘rtasida hosil bo‘lgan boshqa plitalarga bosim o‘tkazib turishi tufayli hosil bo‘lgan. Shubhasiz, bu plitalarni ham to‘xtatib bo‘lmaydi. Ertami-kechmi zilzilalar sodir bo‘ladi”, — deydi Kendzera.
Ukrainaga eng yaqin zilzilalar zonasi Ruminiya hududida joylashgan, biroq bu Ukraina hududlariga yer silkinishi ta’sir qilmasligini anglatmaydi.
“Zilzilalar shu qadar kuchli silkinishlarni keltirib chiqaradiki, ular Ukraina va hatto Moskva, Sankt-Peterburgda ham seziladi. Zilzila episentriga yaqin Odessa viloyatining janubi-g‘arbiy qismida 8 balli kuchli zilzilalar bo‘lishi kutilmoqda”, — deydi ruminiyalik olim.
Turkiya va Suriyadagi zilzila
6-fevral kuni Turkiya janubi-sharqida 7 balldan yuqori bo‘lgan ikkita zilzila sodir bo‘ldi. Keyin o‘nlab aftershoklar qayd etildi. O‘sha kuni Suriyada ham zilzila yuz berdi. Turkiyada yuz bergan dahshatli zilzila qurbonlari soni 24 617 kishiga yetdi, jarohatlanganlar 80 mingdan oshiqni tashkil qilmoqda.
Izoh (0)