Aholining valyuta ayirboshlashga yoʻnaltirgan pul mablagʻlari hajmi 68 foizga oʻsdi — Markaziy bank

Oʻzbekistonda 2022-yilda aholining valyuta ayirboshlash shoxobchalari orqali sotgan valyutalari hajmi 68 foizga oʻsdi. Bu haqda Markaziy bank raisi Mamarizo Nurmurodov OAV vakillari bilan oʻtkazilgan matbuot anjumanida maʼlum qildi, deya xabar berdi “Daryo” muxbiri.

Mamarizo Nurmurodovning aytishicha, oʻtgan yili respublikaga kelib tushgan valyutalar hajmi sezilarli koʻpaygan.

“2022-yilda eksport tushumlari hajmi 2021-yilga nisbatan 28 foizga oshdi. Yil yakuni boʻyicha mamlakatga kirib kelgan pul oʻtkazmalari 2,1 baravar oʻsdi va qariyb 17 milliard dollarni tashkil etdi. Bu pul oʻtkazmalarining bir qismi kichik tadbirkorlarning eksporti, qoʻshni davlatlar fuqarolarining pul oʻtkazmalarini Oʻzbekiston orqali olishi bilan bogʻliq. Shu bilan birga, aholining valyuta ayirboshlashga yoʻnaltirgan pul mablagʻlari hajmi ham sezilarli ortdi. Yaʼni aholining valyuta ayirboshlash shoxobchalari orqali sotgan valyutalari qariyb 68 foizga koʻpaydi. Bu oʻsish iqtisodiyotda yalpi isteʼmolni oshiruvchi omillardan boʻlib qolmoqda. Bunda banklarning aholi bilan valyuta xaridi va sotuvi oʻrtasidagi ijobiy tafovut 2,9 milliard dollar miqdorida shakllandi. Bu 30 trillion soʻm mablagʻlar muomalaga pul chiqarilishi orqali yalpi talabni moliyaviy taʼminlashga xizmat qilganini anglatadi”, — dedi Markaziy bank rahbari.

Mamarizo Nurmurodovning qoʻshimcha qilishicha, 2022-yilda Oʻzbekistonga valyuta mablagʻlari kirib kelish hajmi 32 foizga ortdi. Respublikadan valyuta chiqib ketishi esa 22 foizga oʻsdi.

“Bu chiqib ketishdagi oʻsish import hajmlarining koʻpaygani bilan bogʻliq. Ushbu vaziyat almashuv kursi barqarorligiga ham oʻz taʼsirini koʻrsatdi”, — dedi u.