31 январь куни Ўзбекистон Республикаси товар-хом ашё биржасида 100 дан ортиқ тендерлар амалга оширилди. “Дарё” мухбири Абдуқаҳҳор Қосимов ҳужжатларни мониторинг қилиб, энг эътиборга молик савдолар ҳақида маълумот беради.
Қариндошлар яна 1 миллиард сўмлик тендерни ютиб олди
20 январь куни “Дарё” интернет-нашрида Uz Chasys МЧЖ ўтказган тендерда иштирок этган And Cargo Trans Service ва Zafarbek Cargo Trans Servis корхоналари қариндошлик алоқалари билан боғлангани ҳақида материал эълон қилинганди. Шундан сўнг Uz Chasys корхонаси ҳолатни тасдиқлаб, тендер юзасидан тузилган шартномани бекор қилди. “Дарё” кузатувларига кўра, бир-бирига афилланган ушбу корхоналар иштирокидаги тендерлар ҳали ҳам давом этмоқда.
31 январь куни транспорт воситалари қисмларини ишлаб чиқариш билан шуғулланувчи Уз-Донг Wон Cо қўшма корхонаси ташиш ва етказиб бериш хизмати учун ўтказган тендер якунланди. Бошланғич қиймати нақ 1 миллиард 1 миллион 600 минг сўм бўлган лотда юқоридаги And Cargo Trans Service ва Zafarbek Cargo Trans Servis МЧЖлар иштирок этган.
.jpg)
.jpg)
Гап шундаки, ушбу икки корхона таъсисчилари ҳисобланган Исманов Мухиддин Гуламжанович ва Исманова Фатмахон Игембердиевна 100 фоиз улуш билан афилланган шахслар ҳисобланади. Ушбу тендерда “Давлат харидлари тўғрисида”ги қонуннинг 14-моддасида (манфаатлар тўқнашуви) кўрсатилган қонун талаблари қўпол равишда бузилган.
“Дарё” мухбири ҳолат юзасидан тадбиркорлар фикрини ўрганиш мақсадида улар билан боғланишга уринди. Аммо кўрсатилган алоқа телефон рақамларидан бири вақтинча иш фаолиятида эмас экан. Иккинчи рақамга қилинган қўнғироқни кўтарган шахс адашиб тушганимизни билдирди.
Тасодифлар кетма-кетлиги
Хавфсиз дарё бошқармаси канал ва сув омборлари қурилмаларини тозалаш ишларининг лойиҳа ҳужжатларини ишлаб чиқиш учун 24,5 миллион сўмлик тендер ўтказди. Унда 2 та иштирокчи қатнашди ва “Йўл Уй Сув Лойиҳа” МЧЖ ғолиб, New Роад Water Project захира ғолиб деб топилди.
Рақобатчиларнинг раҳбарияти, очиқ маълумотлари билан танишиш жараёнида иккита шубҳали ҳолатга дуч келдик.
Тендер ғолиби “Йўл Уй Сув Лойиҳа” МЧЖнинг таъсисчиси ва раҳбари Турсунова Зухра Намоз қизи. Корхона Тошкент шаҳри Олмазор туманида жойлашган.
New Роад Water Project МЧЖнинг раҳбари Худойшукуров Қувончбек Тожимуродович. Корхона Тошкент шаҳри Чилонзор туманида жойлашган.
Маълумотларга эътибор берилса, иккала тадбиркорлик субъектларининг алоқа телефон рақамларидаги сўнгги 4 та рақам бир хил: 41 76.
Бундан ташқари, ғолиб МЧЖнинг электрон почта манзили мана бундай: nr_waterproject@mail.ru. Рақобатчи корхонанинг номига жуда ўхшаб кетади.
Бу ерда қонун бузилиш ҳолати борми ё булар шунчаки тасодифми? Масъуллардан изоҳ кутиб қоламиз.
Рақобатчиларнинг бир хил телефон рақамлари
Сурхондарё вилояти 2-сон руҳий-асаб касалликлари шифохонаси беморларни ювинтириш хизмати (ҳаммом) учун бошланғич қиймати 42 миллион 900 минг сўмлик тендер ўтказди. Унда “Сурхон Ёқут Сифат” ва Супплиэрс Сале МЧЖлар рақобат олиб борди.
Комиссия аъзоларининг якуний баҳоларига кўра, тендерни 90 балл билан “Сурхон Ёқут Сифат” МЧЖ ютиб олди, Супплиэрс Сале эса захира ғолиб.
Тендер иштирокчиларининг маълумотлари билан танишиш жараёнида ушбу икки рақобатчи корхонанинг алоқа телефон рақамлари бир хил экани маълум бўлди.
“Дарё” мухбири кўрсатилган рақамга қўнғироқ қилди. Гўшакни ўзини Шамсиддин Халмуротовнинг ўғли деб таништирган шахс кўтарди. У Супплиэрс Сале корхонаси фаолиятини ўзи юритишини, юқоридаги тендерда ютқазиб қўйганини айтди.
“Аммо телефон рақамлар бир хил экани ҳақида маълумотим йўқ. Балки адашишгандир. Бу ерда ҳеч қандай таниш-билишчилик бўлган эмас”, — деб таъкидлади у.
Абонент аппарати ўчирилган
Фарғона вилояти Данғара тумани марказлашган Тиббиёт бирлашмаси шифохонадаги генераторни таъмирлаш учун 31 миллион 860 минг сўмлик тендер ўтказди. Унда ҳам юқоридаги каби ҳолатга дуч келдик.
Лотни ютиб олиш учун Маркет Магнет МЧЖ ва “Зиё Фаҳир Нури” МЧЖ кураш олиб борди. Якунда Маркет Магнет ғолиб деб топилди.
Статистика агентлиги маълумотларига кўра, Данғара туманида жойлашган ушбу икки корхона таъсисчи ва раҳбарлари бошқа-бошқа одамлар. Аммо алоқа телефон рақамлари бир хил, шунингдек, почта манзилларида ҳам ўхшашлик мавжуд.
“Дарё” мухбири кўрсатилган рақамга қўнғироқ қилганида “абонент аппарати ўчирилган” экани маълум бўлди.
Қонунга эътирози бор тадбиркор
Бухоро электр билан таъминлаш дистанцияси енгил юк транспортларини таъмирлаш хизмати учун бошланғич қиймати 135 миллион сўмлик тендер ўтказди. Унда иккита МЧЖ иштирок этди.
Эътиборлиси, тендер ғолиби бўлган Бухара Auto Leadэр, захира ғолиб Пит Стоп Авто МЧЖлар бир тадбиркорга тегишли ҳисобланади.
“Дарё” мухбири Эргашев Шаҳриёр билан боғланди. Унинг маълум қилишича, тендер 31 январь куни бекор қилинган, аммо тадбиркорга етарлича тушунтириш берилмаган.
“Тендерни бекор қилдик, дейишди. Лекин нега? Ҳа, тўғри, мен иккита корхона билан иштирок этгандирман, аммо ҳеч кимни чеклаганим йўқ, исталган одам кириши, қатнашиши мумкин эди. Қонунга эътирозим бор”, — деди у.
Масъуллардан ушбу шубҳали тендерлар натижаларига эътибор қаратиб, ноқонуний ҳолатлар бўйича тегишли чоралар кўришни сўраймиз.
Изоҳ (0)