Ma’lumotlarga ko‘ra, Oʻzbekiston donorlik, yaʼni qon topshirish koʻrsatkichi ancha past davlatlar qatoriga kiradi. JSSTning tavsiyasi boʻyicha aholiga qon yetarli boʻlishi uchun mingta aholiga oʻnta donor boʻlishi kerak. Raqamlarga qaralsa, 2021-yilda mamlakatda mingta odamga 7 ta donor toʻgʻri kelgan. Ushbu muammolarni bartaraf etish maqsadida prezident Shavkat Mirziyoyev 2022-yil avgust oyida “Respublikada qon bilan ishlash xizmati muassasalari faoliyatini yanada takomillashtirish va aholi orasida begʻaraz donorlik harakatini rivojlantirish choralari toʻgʻrisida”gi qarori imzolangan.
Respublika qon quyish markazi direktori A’lonur Saidovning “Daryo” nashriga bergan intervyusida aytishicha, qarorda birinchi navbatda qon xizmatining moddiy texnik bazasini va Oʻzbekistonda begʻaraz donorlik harakatlarini rivojlantirishga qaratilgan.
“Bu yerda ham ikkita asosiy tomon olinyapti va bizni quvontiradigan holat boʻldiki, birinchi navbatda donorlikni rivojlantirish, donorlik madaniyatini shakllantirishga urgʻu berildi.
Oddiy kelib, qon topshirish emas, donorlik madaniyati boʻlishi kerak. Donorlarning axloqi, oʻziga boʻlgan talabi, qon xizmati bilan oʻrtasidagi munosabat, donorlikni targʻib qiluvchi volontyorlar bor. Shularning orasidagi munosabatlar, qonunan rivojlantirib, jamiyatda har bitta qatlamning, har bitta odamning, har bitta rahbarning vazifalari shu yerda koʻrsatib oʻtilgan”, — dedi markaz rahbari.
Uning alohida taʼkidlashicha, avvallari donorlikni targʻib qilishga koʻplab idora va tashkilotlarning rahbarlari toʻsqinlik qilgan.
“Tashkilotlar eshigiga donorlikni targ‘ib qilish uchun borsak, hatto ichkariga kiritishmas edi. Prezidentimizning qarorlari bilan mana shu masalalar yechildi. Endilikda rahbarlar ushbu masalaga bevosita masʼul etib belgilandi”, — dedi A’lonur Saidov.
Mavzuga doir:
Izoh (0)