Uzoq yillardan buyon davlat tashkilotlarini ixchamlashtirish haqida gapirib kelinar edi. Yildan yilga davlat portfeli shishib boraverdi. Natijada bu davlat budjetiga moddiy yuklamani oshirib yubordi. Va nihoyat oʻsha uzoq kutilgan maʼmuriy islohot amalga oshirilmoqda.
Birdaniga 17 mingdan ortiq xodimni qisqartirish bir qarashda vahimalidek koʻrinadi. Bu ishni toʻxtatib qoʻymaydimi, tizim buzilib ketmaydimi, ishsizlar endi nima qiladi va h.k. savollar koʻp. Shuning oʻzi ham maʼmuriy islohotlar katta siyosiy iroda talab qilganini koʻrsatadi.
Oʻsha iroda koʻrsatildi. Endi buyogʻiga ishni toʻgʻri va samarali tashkil qilish qoldi, xolos.
Aholining koʻpchilik qismida qisqartirishga tushgan 17 ming 447 nafar xodimlarni ish bilan taʼminlash nima boʻladi, degan savol tugʻilmoqda. Ushbu savolga Prezident huzuridagi davlat xizmatini rivojlantirish agentligi departament mudiri Ilhom Qurbonov “Daryo” nashriga bergan intervyusida javob berdi.
“Prezidentimizning Yangi Oʻzbekiston maʼmuriy islohotlarini amalga oshirish chora-tadbirlari toʻgʻrisidagi farmonida alohida topshiriq ketgan — Kambagʻallikni qisqartirish va bandlikni taʼminlash vazirligi mehnat qonunchiligidan kelib chiqqan holda lavozimdan qisqartirishga tushgan xodimlar bilan barcha jarayonlarni mehnat qonunchiligiga asosan amalga oshirish va ertaga ularning ijtimoiy huquqlari buzilmasligini kafolatlash belgilangan.
Farmon ijrosini taʼminlash maqsadida barcha vazirlik rahbarlariga oʻquvlar tashkil etildi. Har bir qisqartirishga tushgan xodimni ish bilan taʼminlashga oʻsha vazirlik yoki idoraning birinchi rahbari shaxsan masʼul. Hech kim koʻchada qolmaydi, munosib ish taklif etiladi.
Har bir idora va vazirliklarning oʻz quyi tizimlari bor. Ularga oʻz yoʻnalishlari boʻyicha ish taklif etiladi. Bu qarorga kelishdan avval qisqartirishga tushgan 17 ming 447 nafar xodim boʻyicha aniq tahlil va hisob-kitoblar qilingan”, — dedi Ilhom Qurbonov.
Davlat xizmatini rivojlantirish agentligi masʼul xodimining qoʻshimcha qilishicha, munosib ish deyilganda sharoit nuqtayi nazaridan ham, moddiy taʼminot jihatidan ham ularga imkoniyat beriladi.
Avvalroq endilikda vazirlik va idoralar qisqargan tarkib bilan qanday ishlashi haqida xabar berilgan edi.
Izoh (0)