Erondagi strategik obyektlarga dronlar hujum qildi. Qator portlashlar yuz berdi (video)

29-yanvarga o‘tar kechasi Erondagi harbiy infratuzilma obyektlarida bir qator kuchli portlashlar sodir bo‘ldi.

IRNA agentligi xabariga ko‘ra, Isfahon shahrida harbiy-sanoat majmuasiga qarashli o‘q-dorilar ishlab chiqaruvchi korxonalardan biri portlagan. Shuningdek, Sharqiy Ozarboyjon provinsiyasidagi Shahid-Salimi shahrida motor moylari ishlab chiqariladigan yirik zavod yonib ketgan.

Eron g‘arbidagi Dizful shahrida joylashgan aviabazada ham portlash ro‘y bergan, mamlakat g‘arbidagi Hamadon, mamlakat shimolidagi Risht shahrida portlash va yong‘inlar kuzatilgan.

Tehronda ham portlash ovozlarini eshitishgan, mahalliy aholi ma’lumotiga ko‘ra, hukumat binolariga hujumlar uyushtirilgan. Guvohlar xabar qilishicha, Eron poytaxti osmoniga qiruvchi samolyotlar ko‘tarilgan.

Keyinroq Eron Mudofaa vazirligi harbiy korxonalardan birida sodir bo‘lgan voqeani tasdiqlab, obyektga dronlar tomonidan hujum qilingani, ulardan biri havo hujumidan mudofaa tizimi yordamida urib tushirilgani, yana ikkitasi portlaganini ma’lum qildi.

Qurbonlar va jabrlanganlar haqida ma’lumotlar yo‘q.

Al-Arabia telekanalining yozishicha, Isroil Eron harbiy sanoatini yo‘q qilish uchun ushbu mamlakat hududida maxsus harbiy amaliyot boshlagan.