Эрондаги стратегик объектларга дронлар ҳужум қилди. Қатор портлашлар юз берди (видео)

29 январга ўтар кечаси Эрондаги ҳарбий инфратузилма объектларида бир қатор кучли портлашлар содир бўлди.

IRNA агентлиги хабарига кўра, Исфаҳон шаҳрида ҳарбий-саноат мажмуасига қарашли ўқ-дорилар ишлаб чиқарувчи корхоналардан бири портлаган. Шунингдек, Шарқий Озарбойжон провинциясидаги Шаҳид-Салими шаҳрида мотор мойлари ишлаб чиқариладиган йирик завод ёниб кетган.

Эрон ғарбидаги Дизфул шаҳрида жойлашган авиабазада ҳам портлаш рўй берган, мамлакат ғарбидаги Ҳамадон, мамлакат шимолидаги Ришт шаҳрида портлаш ва ёнғинлар кузатилган.

Теҳронда ҳам портлаш овозларини эшитишган, маҳаллий аҳоли маълумотига кўра, ҳукумат биноларига ҳужумлар уюштирилган. Гувоҳлар хабар қилишича, Эрон пойтахти осмонига қирувчи самолётлар кўтарилган.

Кейинроқ Эрон Мудофаа вазирлиги ҳарбий корхоналардан бирида содир бўлган воқеани тасдиқлаб, объектга дронлар томонидан ҳужум қилингани, улардан бири ҳаво ҳужумидан мудофаа тизими ёрдамида уриб туширилгани, яна иккитаси портлаганини маълум қилди.

Қурбонлар ва жабрланганлар ҳақида маълумотлар йўқ.

Аl-Arabia телеканалининг ёзишича, Исроил Эрон ҳарбий саноатини йўқ қилиш учун ушбу мамлакат ҳудудида махсус ҳарбий амалиёт бошлаган.