Sayfullo Soipov 2017-yil Nyu-Yorkda yuz bergan teraktda aybdor deb topildi. U o‘limga hukm qilinishi mumkin
AQSH federal sudyasi 2017-yil Nyu-Yorkda yuk mashinasi bilan odamlar ustiga bostirib borishi orqali sakkiz kishining o‘limiga sabab bo‘lgan o‘zbekistonlik Sayfullo Soipovni teraktda aybdor deb topdi. Bu haqda Associated Press xabar berdi.
“2017-yilning 31-oktabr kuni yuk mashinasini Nyu-York shahridagi mashhur velosiped yo‘liga tezlikda haydagan, sakkiz kishini o‘ldirgan ekstremist 28 ta jinoyatda aybdor deb topildi”, — deyiladi bayonotda.
Ta’kidlanishicha, sudyalar ikki kun davomida qariyb yetti soat muhokama olib borib, Soipovni qotillik va xorijiy terrorchi tashkilotga yordam berishda aybdor deb topgan. Ular bir necha kundan so‘ng sudga qaytib, Soipov o‘limga hukm qilinishi yoki umrining qolgan qismini qamoqda o‘tkazishi kerakligi haqida qaror qabul qilishda yordam beradigan qo‘shimcha dalillarni eshittiradi. Nyu-Yorkda o‘lim hukmini chiqarish uchun barcha 12 nafar sudya buni yoqlab ovoz berishi kerak. Soipovning o‘zi sudda ko‘rsatma bermagan.
2017-yilning 31-oktabr kuni Nyu-Yorkda Soipov boshqarayotgan yuk mashinasi Manxetten okrugining janubi-g‘arbiy qismida velosiped yo‘liga chiqib ketib, yo‘ldagi odamlarni urib yuborgan va maktab avtobusiga borib urilgan. Oqibatda sakkiz kishi halok bo‘lgan, o‘n ikki kishi jarohat olgan. Rasmiylar voqeani terakt sifatida baholagan. O‘zbekistonlik muhojir tergovchilarga ISHID terrorchilik guruhi targ‘ibotidan ilhomlanganini tan olgan.
Hujumdan ko‘p o‘tmay, AQSHning o‘sha paytdagi prezidenti Donald Tramp Soipovni qatl qilishga chaqirgan va 2020-yilda 17 yillik moratoriydan so‘ng federal qatllarni qayta tiklagan. Prezident Bayden davrida federal qatllar yana bir bor to‘xtatilgan. Ammo 2022-yil kuzida adliya vazirligi Soipovga o‘lim jazosi berilishini so‘rashini aytgan.
Soipov 2010-yilda O‘zbekistondan qonuniy ravishda AQSHga ko‘chib o‘tgan va Nyu-Jersi shtatining Paterson shahridagi qarindoshlarinikiga ko‘chib o‘tmaguncha Ogayo va Floridada yashagan.
Prokurorlarning aytishicha, Soipov ISHID guruhini hayratda qoldirib, uning safiga qo‘shilish uchun amerikalik tinch aholiga hujum qilgan.
Mavzuga doir: “ISHID videoroliklarini ko‘rib radikallashgan”. Nyu-Yorkdagi teraktda gumonlanayotgan Sayfullo Soipov hamon ISHIDga sodiq qolayotgani ma’lum bo‘ldi
