“Tolibon” O‘zbekistonni yana elektr energiyasi bo‘yicha va’dani bajarmaganlikda aybladi 

Afg‘oniston milliy elektr kompaniyasi (Da Afghanistan Breshna Sherkat – DABS) O‘zbekiston Afg‘onistonga elektr energiyasi eksporti boʻyicha shartnomaga sodiq qolmagani, 250 megavatt oʻrniga 100 megavatt elektr energiyasi yetkazib berganini ma’lum qildi. Bu haqda Tolo News xabar berdi.

DABS rahbari Hikmatulla Oxundzodaning aytishicha, bu miqdorda elektr energiyasi Afg‘onistondagi elektr bilan bog‘liq muammolarini hal qilmaydi. 

“Afsuski, O‘zbekiston va’dalariga qaramay, bu kelishuvga amal qilmadi va Kobulga atigi 100 megavatt quvvat eksport qilmoqda, bu miqdor bizning muammomizni hal qilmayapti”, — deydi “Tolibon” rasmiysi.

Kobul Sanoat va tog‘-kon palatasi elektr taqchilligi sababli ularning 90 foizi faoliyati to‘xtatilganini ta’kidlamoqda. 

“Kobul sanoat parklari elektr ta’minotisiz qolganiga 20 kun bo‘ldi. Ishlab chiqarish tarmoqlarining 90 foizi to‘xtatildi. Umid qilamanki, O‘zbekistonda mavjud bo‘lgan texnik muammolar Afg‘oniston va O‘zbekiston o‘rtasida tez orada hal qilinadi”, — dedi palata rahbari o‘rinbosari Saxi Ahmad Payman.

DABS sobiq rahbari Omonulla G‘olibning aytishicha, DABS Turkmanistondan 500 kilovatt elektr energiyasi olish ustida ishlashi kerak.

“500 kilovattlik kabel Puli Xumri orqali o‘tayotgandi va Osiyo taraqqiyot banki tomonidan qo'llab-quvvatlangandi. Ammo Osiyo taraqqiyot bankining loyihalari to‘xtatilgan. Yagona yechim shuki, xususiy sektor yoki DABS sarmoya kiritib, loyihani yakunlashi kerak”, — dedi G‘olib.

22-yanvar kuni “Tolibon” Afg‘onistondagi elektr energiyasi taqchilligi sababli O‘zbekistonga murojaat qilib, elektr energiyasi bo‘yicha shartnomaga muvofiq o‘z va’dalarini bajarishga chaqirgandi.

23-yanvar kuni O‘zbekiston Energetika vazirligi Afg‘onistonga elektr energiyasini yetkazib berish qayta tiklanishi rejalashtirilayotganini e’lon qildi.