Сайфулло Соипов 2017 йил Нью-Йоркда юз берган терактда айбдор деб топилди. У ўлимга ҳукм қилиниши мумкин
АҚШ федерал судьяси 2017 йил Нью-Йоркда юк машинаси билан одамлар устига бостириб бориши орқали саккиз кишининг ўлимига сабаб бўлган ўзбекистонлик Сайфулло Соиповни терактда айбдор деб топди. Бу ҳақда Аssosiated Press хабар берди.
“2017 йилнинг 31 октябрь куни юк машинасини Нью-Йорк шаҳридаги машҳур велосипед йўлига тезликда ҳайдаган, саккиз кишини ўлдирган экстремист 28 та жиноятда айбдор деб топилди”, — дейилади баёнотда.
Таъкидланишича, судьялар икки кун давомида қарийб етти соат муҳокама олиб бориб, Соиповни қотиллик ва хорижий террорчи ташкилотга ёрдам беришда айбдор деб топган. Улар бир неча кундан сўнг судга қайтиб, Соипов ўлимга ҳукм қилиниши ёки умрининг қолган қисмини қамоқда ўтказиши кераклиги ҳақида қарор қабул қилишда ёрдам берадиган қўшимча далилларни эшиттиради. Нью-Йоркда ўлим ҳукмини чиқариш учун барча 12 нафар судья буни ёқлаб овоз бериши керак. Соиповнинг ўзи судда кўрсатма бермаган.
2017 йилнинг 31 октябрь куни Нью-Йоркда Соипов бошқараётган юк машинаси Манхеттен округининг жануби-ғарбий қисмида велосипед йўлига чиқиб кетиб, йўлдаги одамларни уриб юборган ва мактаб автобусига бориб урилган. Оқибатда саккиз киши ҳалок бўлган, ўн икки киши жароҳат олган. Расмийлар воқеани теракт сифатида баҳолаган. Ўзбекистонлик муҳожир терговчиларга ИШИД террорчилик гуруҳи тарғиботидан илҳомланганини тан олган.
Ҳужумдан кўп ўтмай, АҚШнинг ўша пайтдаги президенти Дональд Трамп Соиповни қатл қилишга чақирган ва 2020 йилда 17 йиллик мораторийдан сўнг федерал қатлларни қайта тиклаган. Президент Байден даврида федерал қатллар яна бир бор тўхтатилган. Аммо 2022 йил кузида адлия вазирлиги Соиповга ўлим жазоси берилишини сўрашини айтган.
Соипов 2010 йилда Ўзбекистондан қонуний равишда АҚШга кўчиб ўтган ва Нью-Жерси штатининг Патерсон шаҳридаги қариндошлариникига кўчиб ўтмагунча Огайо ва Флоридада яшаган.
Прокурорларнинг айтишича, Соипов ИШИД гуруҳини ҳайратда қолдириб, унинг сафига қўшилиш учун америкалик тинч аҳолига ҳужум қилган.
Мавзуга доир: “ИШИД видеороликларини кўриб радикаллашган”. Нью-Йоркдаги терактда гумонланаётган Сайфулло Соипов ҳамон ИШИДга содиқ қолаётгани маълум бўлди
