Janubiy Koreya qirg‘oqlari yaqinida bortida 22 kishi bo‘lgan kema cho‘kib ketdi

Gonkongda ro‘yxatdan o‘tgan yuk kemasi Janubiy Koreya janubidagi Cheju oroli yaqinida cho‘kib ketdi. Kema bortida 22 kishi bo‘lgan, ulardan ba’zilari qutqarilgan, qolganlari qidirilmoqda. Bu haqda Qirg‘oq qo‘riqlash xizmatiga tayanib, Yonhap xabar bermoqda.

Yog‘och tashiydigan Jin Tian kemasi Cheju orolidagi Sogvipxo shahridan taxminan 148 kilometr janubda bo‘lgan. Kechasi u yordamga chaqirish signalini bergan. Qirg‘oq qo‘riqlash xizmati vakilining so‘zlariga ko‘ra, besh nafar dengizchi shu atrofdan o‘tayotgan kemalar yordamida qutqarilgan. Qidiruv operatsiyasi davom etmoqda.

Keyinroq Yaponiyaning NHK telekanali milliy Qirg‘oq qo‘riqlash xizmatiga tayanib 13 kishi qutqarilganini xabar qildi.

Dekabr oyida Tailand qirolligi flotiga qarashli “Sukxotay” korveti Siam ko‘rfazidagi suvlarda bo‘ron tufayli cho‘kib ketgandi. Kema bortida jami 106 nafar dengizchi bo‘lgan.

Mavzuga doir: Tailandda neft tankeri portlab ketdi, 8 kishi bedarak yo‘qoldi (video)