“Daryo” nashri 24-yanvarda O‘zbekiston va jahonda sodir bo‘lgan eng muhim voqealarni e’tiboringizga havola etadi.
Janubiy Afrika respublikasi Rossiya va Xitoy bilan qo‘shma harbiy mashg‘ulotlarni boshlaydi
AQSH Janubiy Afrika Respublikasining Rossiya va Xitoy bilan qo‘shma harbiy mashg‘ulotlarda ishtirok etish qaroridan xavotirda, dedi Oq uy matbuot kotibi Karin Jan-Pyer.
“AQSH, avval ham aytganimizdek, Rossiya Ukrainaga qarshi urush olib borayotgan bir paytda u bilan mashgʻulotlar oʻtkazadigan har qanday davlatdan xavotirda”, — degan kotib.
19-yanvar kuni Janubiy Afrika Respublikasi Mudofaa vazirligi va harbiy faxriylar Rossiya va Xitoy bilan mamlakat qirg‘oqlarida qo‘shma mashg‘ulotlar o‘tkazish rejalari haqida ma’lum qilgandi. Ular 17 — 27-fevralda Hind okeanida, Durban port shahri va Richards-Bey hududlarida o‘tkazilishi kerak. Vazirlik manyovrlarning maqsadini “operativ ko‘nikma va bilim almashish” deb atadi.
Bundan tashqari, yanvar oyi o‘rtasida Belarus hududida Rossiya va Belarusning mintaqaviy qo‘shin guruhlari tarkibiga kiruvchi harbiy aviatsiyasi bo‘linmalarining qo‘shma o‘quv mashqlari boshlangan. Mashg‘ulotlar Belarus harbiy-havo kuchlari va havo hujumiga qarshi mudofaa qo‘shinlari aerodromlarida va poligonlarida 16-yanvardan 1-fevralga qadar bo‘lib o‘tadi. Rossiya tomonidan ushbu tadbirlarda mamlakat havo-kosmik kuchlari jangovar guruhlari qatnashmoqda.
Ukrainada ommaviy kadrlar almashinuvi e’lon qilindi
Ukraina prezidenti Vladimir Zelenskiy turli darajadagi kadrlarni almashtirish rejalari haqida ma’lum qildi. OAV ma’lumotlariga koʻra, prezident ofisi rahbarining oʻrinbosari Kirilo Timoshenko iste’foga chiqqan, yana bir qancha harbiy-fuqarolik maʼmuriyatlari rahbarlari lavozimini tark etishi mumkin.
Bundan tashqari, Ispaniyada dam olgani uchun tanqidga uchragan Bosh prokuror o‘rinbosari Aleksey Simonenko iste’foga chiqish haqida ariza yozdi.
“Kadrlar bo‘yicha qarorlar allaqachon qabul qilingan, bu vazirliklar va markaziy hukumatning boshqa tuzilmalari hamda hududlardagi turli darajadagi rahbarlarga, huquqni muhofaza qilish tizimiga tegishli — kimdir bugun, kimdir ertaga”, — degan Zelenskiy veb-saytida e’lon qilingan murojaatda.
Aynan kimlar iste’foga chiqishi mumkinligi haqida “Ukraina haqiqati” o‘z manbalariga tayanib xabar berdi. Nashrning yozishicha, Timoshenkoning o‘rnini Kiyev viloyati harbiy ma’muriyati rahbari Aleksey Kuleba egallashi mumkin.
“Babel” nashriga ko‘ra, Timoshenko viloyat ma’muriyatlaridan birini boshqarishi mumkin. Sumi va Dnepropetrovsk viloyatlari rahbarlari, shuningdek, 2022-yilda Rossiya tomonidan anneksiya qilingan Ukrainaning Zaporojye va Xerson viloyatlari maʼmuriyatlari rahbarlari isteʼfoga chiqishi mumkin.
JSST davlatlarni bolalar o‘limiga sabab bo‘lgan dorilarga nisbatan chora ko‘rishga chaqirdi
Jahon sog‘liqni saqlash tashkiloti (JSST) yo‘tal siroplari bilan bog‘liq bolalar o‘limi holatlaridan so‘ng xavfli preparatlardan himoya qilish uchun “tezkor va kelishilgan choralar” ko‘rishga chaqirdi. Bu haqda Reuters xabar berdi.
Tashkilot holat yuzasidan bayonot berib, 2022-yilda Gambiya, Indoneziya va O‘zbekistonda 300 dan ortiq bola, asosan, 5 yoshgacha bo‘lganlar, xavfli tarkibiy qismga ega dorilar sababli o‘tkir buyrak yetishmovchiligidan vafot etganini ta’kidladi. Mazkur sirop tarkibidagi etilen glikol va/yoki dietilen glikol bolalarning o‘limiga sabab bo‘lgan.
“Bu moddalar ishlab chiqarishda erituvchi va antifriz sifatida ishlatiladigan zaharli kimyoviy tarkib bo‘lib, ularni oz miqdorda bo‘lsa ham qo‘llash o‘limga olib kelishi mumkin va hech qachon dori vositalari tarkibida bo‘lmasligi kerak”, — deyiladi bayonotda.
JSST 194 ta davlatdan o‘lim holatlarining oldini olish uchun chora ko‘rishga chaqirdi.
Eslatib o‘tamiz, O‘zbekistonda kamida 20 nafar bola Hindistonda ishlab chiqarilgan “Dok-1 Maks” siropini iste’mol qilish ortidan vafot etdi. Hozirda davlat xavfsizlik xizmati tomonidan “Dok-1 Maks” preparati bilan bog‘liq holat yuzasidan jinoyat ishi qo‘zg‘atilgan. Hindiston hukumati “Dok-1 Maks” dorisini ishlab chiqargan kompaniyaga qarshi ish ochgan.
Kompaniyaning sirop ishlab chiqarilishi to‘xtatilgan. JSST “Dok-1 Maks” va “Ambronol” dorilari haqida ogohlantirgan. Hindiston hukumati “Dok-1 Maks” dorisini ishlab chiqaruvchi kompaniyaning litsenziyasini to‘xtatgan.
O‘zbekistonda hokimiyat organlari va hokimlarning ayrim majburiyat va vakolati bekor qilinmoqda
O‘zbekistonda mahalliy davlat hokimiyati organlari va hokimlar ayrim vakolatlardan mahrum bo‘lmoqda, deb xabar berdi Norma.
Maʼlum qilinishicha, “O‘zbekiston Respublikasining ayrim qonun hujjatlariga oʻzgartish va qo‘shimchalar kiritish to‘g‘risida”gi qonun prezident tomonidan imzolandi.
Kiritilayotgan o‘zgarishlar mahalliy davlat hokimiyati organlari, hokimlar, bojxona organlari, Iqtisodiyot va moliya vazirligi vakolatlariga hamda MCHJni majburiy auditdan o‘tkazish talabiga oid.
Qarorga ko‘ra, mahalliy davlat hokimiyati organlarida tibbiy yordam sifatini klinik-statistik standartlarga rioya etilishini nazorat qilish vakolati bekor qilinmoqda
Hokimlar uy-joy mulkdorlari va uy-joydan foydalanuvchilaridan kommunal xizmatlar to‘lovi va majburiy badallarni to‘lash bo‘yicha qarzlarni undirish to‘g‘risida da’volar bilan sudga murojaat qilish vakolatidan mahrum bo‘lmoqda.
Endilikda chet davlatlarda ro‘yxatdan o‘tkazilgan va O‘zbekiston hududida vaqtincha foydalanilayotgan transport vositalarining egalari majburiy sug‘urta bo‘yicha majburiyatlarning bajarishi ustidan nazoratni bojxona organlari amalga oshirmaydi. Ushbu vakolat davlat yo‘l harakati xavfsizligi xizmatida saqlanib qolmoqda.
Vazirlar Mahkamasi, Moliya va iqtisodiyot vazirligining auditorlik faoliyatini tartibga solish bo‘yicha ayrim vakolatlari nodavlat notijorat tashkilotlariga o‘tkazildi.
Izoh (0)